Omupresidente Netumbo Nandi-Ndaitwah okwa thindi omuthindo nokukumagidha oshigwana shi longithe omikalo adhihe okukeelela omukithi gwomalaria ngoka gwa dhipaga aantu 95 momasiku ashike omashona.
Nandi-Ndaitwah okwa kumagidha ngaaka sho kwa li taku dhimbulukiwa esiku lyaaniilonga mOshakati mEtine, lya dhimbulikilwa mokapale kemanguluko.
“Omukithi gwomalaria ogwa kala nokulopotwa tagu indjipala miitopolwa oyindji moshilongo, onkene epangelo olya kala nokuyambidhidha okushonopaleka iipotha yoMalaria osho wo omaso,” ta popi ngaaka.
Minista guuhaku nonkalonawa Dr Esperance Luvindao esiku lyaaniilonga okwa popi kutya omukithi gwoMalaria ogwa dhipaga aantu ye li 95 okuza mo20 yaApilili nuumvo.
“Okuza momasiku 25 gApilili nuumvo iipotha yi li 56 130 oya lopotwa omanga aantu 45 649 ya taambelwa moombete omolwaMalaria omanga iipotha yoMalaria okuza kondje yoshilongo ya ndhindhilikwa yi li 10 466,” Luvindao ta ti ngaaka.
Ta ti, iipotha mbyoka oya lopotwa miitopolwa ngaashi, Omusati, Ohangwena, Oshana, Oshikoto, Otjozondjupa, Omaheke, Kavango West, Kavango East, Zambezi osho wo Kunene.Minista okwa popi kutya omwaalu ngoka otagu ulike oshiponga shoMalaria onkene oshigwana osha pumbwa okwiisila oshimpwiyu opo kaashi like koomwe.
Luvindao okwa kumagidha oshigwana shi longele kumwe naanambelewa taya ka pombela omagumbo gawo.
Ta ti, otaya ka kala ye na omandhindiliko ngoka taga ulike kutya oya za koombelwa dhontumba osho wo komalelo goondoolopa shili.
“Okupombelwa okwa simana, okukeelela omukithi gwoMalaria ngoka hagu ziilile unene moomwe nohagu faalele wo oomwenyo dhaantu,” ta ti ngaaka.Ta ti, okukeelela Malaria ga indjipale ongele ashike oshigwana tashi ka pitika aanambelewa mboka ya pombele omagumbo gawo.
Luvindao okwa ti ngashiingeyi okupombelwa oku li metifa oshoka olyo ethimbo oomwe dha pimbila sho kwa loka shinene nuumvo.
“Otandi indile oshigwana shi longele kumwe naanambelewa mboka,” ta thindi omuthindo.
Luvindao okwa ti, omiti ndhoka hadhi pombelwa inadhi nika oshiponga, nohadhi kala mo ashike ominute omishona, omanga megumbo inamu yiwa.
Ngoka ta ka kala e na omalimbililo kombinga yaanambelwa mboka, na dhengele koombelewa dhomalelo goondoolopa.