Hilma Nakanduungile
Omundaungilo–Mokukwama noveta kadipwege mosayitunga mokuhamena mbatero navagwana vaduni ntani vakurupe, vantu vatunga mononzugo dopampo momukunda horowero gwaOhangwena mvhura zina puko, mbeterewa zaPresidente gona, ruha nye rwava vaninkiliramo kwatungisapo nonzugo doyipereki dokusika ko 29 momukunda gwaOmundaungilo omu vatunga unene vaduni. Moutano una puko, vatungimo kavamwene nye sihorokwa sokugava marutjeno esi karugene Munekuto Bernard Haufiku mokukwateramo Presidentegona Nangolo Mbumba. Mokukwama nye elikwamo vatulisapo lyokuvatera vantu, NORED kwatulisapo nye elikwamo lyopokatji ntani lyokohi, muna hamene noramba domononzira yipo asi vatungimo vagwane rutjeno. Ntano awo kavagene mavango nye gokugwanene rutjeno gokusika ko 50, ntani mambo 29 yigo nye kagagwanenemo uwa. Elikwamo eli lyorutjeno kukana kupura nye yimaliwa yokusika koN$324 736.80
Posiruwo oso munasipundi gwaNored Sackey Kayone katente asi projeka ezi sitambo sazo kuna kara tupu asi kufukisa kugwana rutjeno unene kovantu ava vakara asi kwavaninkiliramo yipo asi ava vana kara asi kuna kugwana mauwa gomasesu ntani neyi avagwanamo. Mokukwama mwendi Kayone, Nored kwapulisira nomiliyuna murongo, N$10 mwankenye eyereko lyoyimaliwa kutunda mo2015, vayitulire ntere asi yokugava rutjeno kwankenye evango nampili mavango gokodoropa ndi ponze zodoropa. “Kapi hena avatara asi muntu ogo mulyo gwendi ngapi owo kutura tupu rutjeno ngwendi moomu vana yatura nayina momukunda Horowero gwaOhangwena. Ekango laHamulenge mukunda gwakara moOhangwena, Eeshoke rukanda rwakara moOshikango, Ekolola kwakara moEenehana, Uushake pevango eli nye vatura vaporosi road block opo vatura nye yakahurako morwa evango eli valitura asi lyokutunga paveta.
Noprojeka nadinye odo nare vamana kudirugana ntani mavango nagenye ogo vaga gava kovagwanenimo uwa mo 2018, yimo ana kutanta Kayone. Nampili ngomu yakara asi Nored yamutompoka mokugavera rutjeno, Kayone simpe kageve runyegenyo rwendi kovantu vamwe vagwanenamo uwa, nye ngesi kuna kusilika vakwawo asi ngano vahagwana mauwa ogo unene monomukunda horowero edi ne dina kara asi; Oshikoto, Ohangwena, Omusati ntani Oshana omu katente asi kuna kurugana yininke yahana asi yopaveta ntani kapi vana kupulisira ekuliko monomuknda. Nokugwedako asi vamwe simpe kuna kutunga mambo gawo pepi nomarutjeno yina kara asi siponga unene. Age kahundilire vantu vatunde komukaro gomudona ogu vana kara nago ntani mukaro gokuvaka marutjeno gwahepa kuhaga. Mosihuyungwa nye saMbumba esi kavakamuresereremo Nored kavamupandwire morwa kudiworoka vantu vendi. Nokutanta asi noprojeka nye ezi zokutura marutjeno monomukunda hawe eparu lyovantu vetu talikara lina wapa momunene. Age simpe katente asi nagumwesi nayirwanesa asi rutjeno kuna kara simwe sina pumbwa mokukara asi kuvhura kutwara ekuliko komeho. ‘’Ame kuna kuyimona asi egano eli lyokutwara rutjeno kovaduni nayiretesapo erunduruko meparu rwawo, ntani awo navarunduruka apa vakere nare. Yimo ana kutanta Mbumba.
Simpe Mbumbakatente asi Omundaungilo novatungimo vamo unene vaduni ngesi Nored anamuretere rutjeno yina kuliza kumwe negano lyepangero mokureta ekuliko kovantu. Omu yina kara asi vantu ava vaninkiliremo vahepa kugwana mbatero vaparuke moomu vana kuparuka vatungimo navenye. Gumwe ogu kagwene uwa ou, kuna kara Sadrag Amupolo katente asi age kuna hafa morwa uwa ou vana varetere. ‘’Ame nina hafa asi ngesi tuna kara nomema, mambo ntani rutjeno. Yina kara asi kukara momundema yina kara nye simwe sakapita, yimo ngoso ana kutanta Amupolo.