Rudolf Gaiseb
Dira zimwe hena kazihamenene mehudi, siruwo esi kamuhamenene tupu nye gyrocopter kayihorokerere koEros airport moVenduka moune kaupwire. Musingi dira, ogu kakere asi gelikemo modira, katumpukiremo gahana urema nampili wongandi.
Eyi kayikweme kosihorokwa kasihorokere opo Cessna 406 kakatukire pokapare kooko makura kumwe nokukalipoyora membo morukanda rwaPioneerspark mo 3 May 2024. Ben Engelbrecht, ogu ana kara asi mukonakoni moruha rokukona kona nsene asi dira zina kara mehudi, katente asi ehudi lyangesi kapi lina kara asi lyedona unene, ntani dira gona ezi kwaziweka muntu pwaumwene. Edina lyendi kapi tuna kuligava morwa kuninkira nye umwene womuntu. Mokukwama nye age Engelbrecht, asi dirav ezi kwakara asi kwahamenamo maruha gatatu, unene pokutembera ntani pokukatuka. Circuit zauvali opo nye dira zina kutembera, opo nye zina kuhara asi ngano zisikamenye nawa nawa, mpepo ndi kakundungu makura dira ozo kuza nye nompepo, makura yiyo kaziligende kugwira korulyo pevhu. Musingi kalizuvhire tupu nakakuke kokuguru kwendi korumoho. ‘’ Ano dira kazizonaukire unene koyiha yomavava nekoso; sintuku ntani musira kayitekere.
Dira ezi kapi azirugana paunangesefa. Musingi ogu kwakara moSwakopmund- ntani siruwo age kusinga tupu moSwakopmund. Ano ngoso age kahere tupu asi aliyikise kusinga komavango peke ntani mavango gopepi naEros airport. ‘’ Sikando sokuhulilira gasingire kwatundire koSwakopmund momazuva 10 April 2024, makura age tatembere tupu nakauke. Mezuva nye eli kalihorokere ehudi, age katokwere kutuka hena nodira, yipo aliyikise mwene nodira nokapare, yimo ngoso yina kulikida. Nampili ngoso age kwakara nombapira pulisiro zokusinga dira,’’ Engelbrecht yimo ana kutanta. Age kagwedereko asi, kutunda nye apa, ose natukona kona nye nayinye. Apa ngesi kuna kara asi mpepo yizo zina kara noudigu, twahepa kuyitara nawa eyi. Ose kapi tuna kugazara asi kuna kara udigu kodira, morwa age katemberere nawa ntani hambara kusika mokusikama nawa nawa.
Poopo tupu nmye kakundungu kakawizire katundlire korumoho makura kuzundura dira zigwire korulyo. Mokukwama nye ruha ronodira moNamibia, Toska Sem, ogu gakara asi gokoruha royihoroka pangenderera, katente asi dira zina zonauka.