WALVIS BAY – Mueteleli wanaha Netumbo Nandi- Ndaitwah uelelize babali mwaliluko labundui kuli poto yahae nesi yalishano kono kuteeleza ni kuikambota nibabaitengile mwabundui. Mueteleli wanaha nasindeketilwe kiMubakweli Wahae, Lucia Witbooi, Ngambela Elijah Ngurare, likwambuyu wanjimo Inge Zaamwani, ni likwambuyu waKatulo ni Misebezi Fillemon Immanuel, kuyo ikambota nibabali mwaliluko labundui.

Liluko la bundui litalimana ni butata, mi kucaula ni mizeko yamisebezi seli litaba zakamita. Babeleki nebacaula babata kuabelwa hande mayambelo ni silelezo sakata yamisebezi yabona, hala lipilaelo zalicinceho zena nikuezahala. Kwanda zeo liluko, nihane libihile masheleñi akucinca kuzwelela linaha zakwande alikanana bolulelule balishumi (N$10 billion), neatile banze batalimana ni kufukuzeha kwalitapi.

Butata bobuñwi kibuitukiso bwamubuso, hala muleo oneubata kufa misebezi kwamandui bane balatehezwi kimisebezi yabona kasamulaho akucaula mwasilimo sa 2015. Muleo utalimani ni butata bobuzwelapili, nihaike mubuso ulikile hañatañata kubata tatululo. “Halusikatela kutobapala papali yakusupana minwana. Lutile kuto teeleza ni munahano okwaluhile kubao babatalimana ni butata mwaliluko le, zazi ni zazi. Nitile kuto ikambota ni kuteeleza, ili kuli luutwisise butata bobuliteni mwakalulo yabundui nikuli lufumane tatululo hamoho,” mueteleli wanaha nabulelezi bane bakubukami kwamukopano kwaHotela yaAtlantic. 

Naize kuikambota kimulelo wakamaiso yahae kubata kutaleleza mulelo wazwelopili waNDP6, oyelela ni mulelo wakopano yaSwapo one uhatisizwe nako yaliketisa kukala 2025 kuisa 2030 ni Poono 2030. Nakupile babali mwaliluko labundui kutokomela nikumamela kuli limbule mwaliwate lisweli kufukuzeha. Naekelize kuli kuikambota neli kwakuteeleza, kuutwisisa nikunyatisisa hamoho kuli kueziwa cwañi, nikubona kuli zekona kusebeza kilifi kumbweshafaza kalulo yabundui.