MOAMINUIS Ekwareko eli lyapira kuhoroka rumwe kalihorokere momukunda gwaAminuis paapa mugara gedina Tjiuma Kamberipa kakwere vantu namumbyendi zinyawo naguhyawo vamwe tupu.(Kangendje naVaanda Kanaruzo) Vantu namumbyendi owo nare vagusa kukara nomugara ogo,vene kuna kutanta asi kwakara namumati gwawo ogo nomvhura ntano.Yipo asi awo kapi yina kuvatetukisa mokuza mononkwara dawo edi vana kugazara asi kuna kulikida mpo asi awo kuvhura kuparuka namugara gwawo.Kamberipa gahepa kututa nongombe ne ngoyigondwa ntani N$5500,00 kwa nkenye mukadendi.Ano edi nongombe ne tadi zi kovakurona wovakadi vendi.Age hena kadwere nolinga komawoko gendi nagenye gavali.Apa nye kauyungire kwaNew Era konyima tupu zokumukwareka Kamberipa katente asi “Ame kuna tokora kukwara vakadi vavali morwa untu womuntu orugane eyi ono hara”.Nkenye gumwe kwahara kuweka mahauto gomanzi kupitakana limwe,mambo gomanzi, nongombe, morwa sinke nani pira kuyirugana oyo nipire kukara novakadi wovanzi. Mugara ogu gonomvhura nomurongo ntano katente asi kapisi yimo ana hara asi akware vantu namumbyendi nye morwa age navenye kwavahara.Ntani hena age kapi ana kumona epuko ndi asi nampo ngakara noudigu mononkwara dendi kuna kuyimona asi kuvhura yimutompoke moomu yawapera yono nkwara.Kuvhura kukara noudigu nsene asi mwato umpitisili membo nye Ame kuna kugazara asi kuvhura nigave umpitisili membo lyange,morwa nina diva asi ngapi nani kayigendesa.Kamberipa simpe kuna kugwedako asi age nare gagusa kurara novakadi ava vavali mbete zimwe tupu,nye kapi pwahoroka nampili udigu wongandi yipo asi takayirugana ngorooro ngoso.Morwa sinke vantu namumbyendi navalirwira esupa?Kepuro nye asi vangapi nampo muntu novura kukwara age katente asi oyo kukwama omu ono hara nomu ono yiharere. Kuvhura mugara otameke nagumwe ntani ono kuza kwamukwawo ntani nsene simpe kuvhura kuza komeho.Age simpe katente asi kapi ana kumona epuko morwa ediveta lyosirongo setu, alyo kwafumadeka mpo yipo nye asi kwapulisira mugara akware vakadi wovanzi.Odo nonkondo danyamwange mokukara novakadi wovanzi moomu ninayiharere nsene asi epangero kwafumadeka untu womuntu morwa sinke nava gazarera asi nonkwara dange nondona.Guhya vana owo vavali Karimuya Kazondanga,katente asi nampili ngomu yina kara asi kapisi yimo ana hara asi vana vendi vavakware mugara gumwe tupu nye kwato eyi navhura kurugana nsene vene vanayipanda. Mouzuni wantani vakurona kapi vana kutokora vanona vene yiwo vana kutokora ano vakurona kupurakena tupu.Age yiyo katente asi etokoro kuna kara lyawo vana vange namugara gwawo yipo nye asi name nakona kuyifumadeka oyo.Muswamane ogu gonomvhura 78 katente asi simpe kapi gamona nonkwara dokukwareka vakadi vavali meparu lyendi mugara gumwe tupu siruwo sooso.Age yiyo katente asi pwanare kwakere tupu asi nsene mukadi ogu gakwara mugara ogo kapi ana kuvhura kurugana eyi yawapera mukadi ndi kuna remana kapi ana kuvhura kurugana nkenye eyi awo ngava hundirenye mumbya gomukadi ogo aka vatere mukurwendi mokukakara mukadi gwauvali.Simpe kagwedereko asi nonkwara kapisi sidira mokukwama mukaro govaHerero.Edi kapisi nonkwara dokuhova kovantu ava vavali navenye kwafisa vawo.Ano ogu mugara nage kwafisa gwendi.Munonapo powo ana kwara Kamberipa kwakarapo namunendi gumwe,age nare gakara novana 38 novazina wokulisigasiga vana siki komurongo.Konyara vantu wokusika ko 600 kava kakere pekwareko eli vamwe kava tundire ure ngwendi Okakarara vakakarepo pekwareko eli morwa kuna kara esanseko mosirongo.Kamberipa gumwe gadivikwa momukunda gwaAminuis. Age kuna kara nompanguro ezi zina kumundindira moGobabis zokukara nouta wahana mbapira pulisiro.Age kwamukwete paapa yahorokere yokuliroyanga vaporosi novantu ava vapilire kuhara asi etungiko lyaforomani likakare momukunda gwawo.Hahende ogu ga kara moVenduka gedina Unanisa Hengari katente asi pwato epuko kwaKamberipa mokukwara vakadi vavali morwa veta zopa mpo zayipulisira.Ano nsene ngahara asi vakadi vendi vavadive mokukwama epangero gumwe tupu ngava divako ano ogu gumwe hawe.Hengari ogu ana kara ngesi mepwizumuko koKapa kagwedereko asi kapisi musininiko asi okware paveta nye siruwo ngasi sika apa ngava mupura asi agave undipo ndi asi mbapira ezi zina kulikida asi gakwara. .