Elelo lodoolopa yaSwakopmund ola yandja onhele yetungo linene olo li li molukanda laTamariskia opo li longifwe okutula ovanhu ava tava ka kwatwa kombuto yoCovid-19 notava ka pumbwa oku likalekelwa.
Omunambelewapitifi wodoolopa Alfeus Banjamen okwa hokolola ta ti elalakano lokuyandja onhele ei okushakeneka epangelo ondjilakati, unene tuu pefimbo eli lidjuu moshilongo mu na omukifi ou wa nyika oshiponga neenghono.
Benjameni okwa ti ombelewa yaye oya kala noku lopotelwa kombinga yoipangelo oyo iyadi unene ovanhu va kwatwa koCovid-19, onghee naasho osha kala eshongo linene la taalelwa koipangelo moshitukulwa shaErongo.
“Elelo lamuni waSwakopmund oli na oshisho novakalimo aveshe notali kwashipaleke kutya modoolopa yaSwakop omu na onhele ya wana okutula ovanhu va kwatwa koCovid-19. Onghee otwa tokola opo tu yandje etungo lakula eli li li moTamariskia opo li longifwe li shiive okuningwa oshipangelo shokukala keshe omunhu ta ka monika ombuto ei,” Benjamen ta ti.
Oshitukulwa Erongo osho shimwe sha didilikwa shi na omwaalu wovanhu tau ende wa uka pombada efiku nefiku tava kwatwa kombuto yoCovid-19, nomwadidilikwa mu na oipangelo ihadi unene ovanhu ve na ombuto ei.
Benjamen okwa popya ta ti onhele ei va yandja omwa tamekwa nale okutulwa eembete di li 40, odo da landwa kelelo lopashitukulwa shErongo.
Okwa hokolola ta ti oikwafifo yoCovid-19 aishe opo i li ya wana, notai ka tulwa metungo olo la ningwa oshipangelo mopaife.
“Ohatu twikile nokuyandja eenhele dihapu modoolopa yaSwakopmund odo tadi ka longifwa okutula ovanhu ve na oCovid-19. Onghee oshiwana inashi pumbwa okukala sha tila kombinga yomhumbwe yeenhele moipangelo shaashi muni waSwakopmund otaka kwafela,” Benjamen ta ti.
Okwa kunghulila oshiwana opo shi liufe komilandu doCovid-19 efimbo keshe shaashi omukifi otau dipaa ovanhu neenghono.