WINDHOEK – Muzeko wa mapokola babalalu ba muleneňi wa Windhoek (City of Windhoek) bao bahapelezwa mwa pulao yayo na akalezwa busholi, wa lilimo ze mashumi ka lilimo ze supile (17) za kupepwa ya nali mwa pabalelo ya bona u atumezi ku tateka mwa kuta ye pahami ya Windhoek.
Nako ya makalelo a muzeko la Bune, muatuli wa kuta ye pahami, Judge Christi Liebenberg u shimbululezi muzeko kwa pata kala 19 Yowa 2015 kufa sibaka muuso kufitisa bupaki ni milatu mwa taba ye. Muyemeli wa mulao wa bao ba hapelezwa mwa taba ye, Orben Sibeya na fitisize kupo la Bune kakusasana kakutaluseza muatuli wa kuta ye pahami kuli na sikaba ni nako ya kuitukiseza bakeňi sakuli yomumwi kubao ba hapelezwa mulatu nali kwa sikolo sa tuto ya bupokola kwa Ondangwa mi u konile feela kuikopanya ni yena la Bulalu. Mapokola babalalu, Werner Johannes Shitekela wa lilimo ze mashumi a malalu (30), Kleopas Shikalepo Kapalanga wa lilimo ze mashumi a mabeli ni lilimo ze ketalizoho ni zetalu (28) za kupepwa ni wa lilimo za kupepwa ze mashumi a malalu (33) Elia Nakale ne ba bonahezi fa pata a kuta lwa bubeli kamo taba ya bona neishimbululezwi kwa kuta ye pahami. Ba talimani ni mulatu wa bubulai, kunga mutu ka kapelezo ni kubata kulubaluba kapa kusinyasinya bupaki.
Kakuya kabupaki ku taluswa kuli ne ba bulaile Mandela Ramakhuha ya nali wa lilimo ze lishumi ka lilimo ze supile za kupepwa ka kumunataka mwa toho ni mubili kaufela, ku mutama kwa mazoho ni ku mubitela fa fasi, kamukwa o cwalo a yo shwela mwa sipatela sa Katutura kala 24 Lungu 2013 kalibaka la likolofalo zeo. Mulatu wa kumushimba ka kapelezo u tolokwa kuli bao ba hapelezwa neba palelisizwe Ramakhuha tukuluho ya buikasaneli ni ku mutama isi kamulao lihola ze peli kuisa kuze ne pili ba sika mutambeka kale mwa mazoho a mapokola ba Namibia kwa siteshini sa Windhoek. Mulatu wa bulalu u talusa kuli bao ba hapelezwa bufosi ne babatile kulubaluba buniti kakuyobiha kwa sipokola sa naha kuli mufu a tamiwe kalibaka lakuli na kozwi ni kuekeza kuli wa kula kapa u mwamandingwe. Ni kuli neba palezwi ku biha ku babahulu babona taba ya kuli ne balindauzi mufu ni ku mupaleliswa kufumana likalafo, kuzwa fateni bupaki bwa mwa kuta yepahami bubaleha kuli ne ba palezwi ku lemusa bashemi ba hae ko neba muisa teni. Ka kuya ka bupaki bo nebuyalilwe, butalusa kuli bao bahapelezwa kaufela bona ki ba sipokola sa tolopo ya Windhoek (Windhoek City Police) bao nebali fatibelelo ya kubizwa mwa nako ya putako mi ne ba ezize kezo yeo ka kulumelelana nako yeo bayoshimba mufu kwa sibaka sa manwelo mwa busihu bwa la Bubeli kala la 16 Lungu.
Ne ba akalelize mufu kuli nabile mwa taba ya busholi bwa mafoni ni makompwita a na uzwizwe kwa Ma ofisi a matuna a ba muleneňi wa Windhoek (City of Windhoek Head Office),” ki kamo bupaki bubalehela mwa kuta ye pahami. “Bao ba hapelezwa neba longile mufu mwa mota ye sikaumbelezwa ka kumutama kwa mazoho. Mwa nako yenebanze ba matamata ni mufu kusina tumelelano kuzwelela kwa bashemi ba hae, baba hapelezwa nenze ba tikitiba mufu wa lilimo ze lishumi ka lilimo ze supile kuamana ni taba ya bulengwami ni ku bata kuziba ko libyana ze neuzwizwe linzi teni ni kafo bafumaneha basilikani sahae mwa taba ya bulengwami,” ka kuya ka bupaki
Kuzwelwa pili kutalusa kuli nako yeo Ramakhuha hanali cwalo mwa mazoho a bona, bao ba hapelezwa nenze ba munataka ka milamu mi na zamaisizwe mwa libaka ze shutana-shutana mwa Windhoek. Ha seba matile matile ni yena mwa Windhoek lihola ze peli kuisa kuze ne, bao ba hapelezwa ba yo lula nyandi ya nali mwa mandingwe a kunatakiwa fa siteshini sa mapokola sa Windhoek ni kulaela kuli a kwalulelwe muzeko wa bulengwami. Mapokola bao nebali fa musebezi ka nako yeo ba isa muchaha ya nali mwa mandingwe kwa sipatela sa Katutura ko na izo timelela teni ka libaka la kuholofala kwa lilama za mubili zeo nelitisizwe ki kubumauliwa, kamo ku akalezwa.