Ehangano opo lya totwa lyedhina Namibia Local Business Association (Naloba) olyi li ompinge nedhiladhilo lya tothwa mo kumininsta guunamapya Calle Schletwein, kutya aakwiilongo otaya vulu okuninga omayindilo giikunino yiikwamboga moNamibia.
Schletwein ndhoka anuwa okwa li e dhi popi pethimbo lyoDubai Expo 2020, ya ningwa nuumvo.
Omupresidente gwehangano lyoNaloba Erastus Shapumba okwa ti, itaya tsu kumwe nedhiladhilo ndyoka epangelo lya hala okuninga omolwomatompelo ga yooloka.
“Aakwiilongo ohaya kolonyeke Aanamibia ngele tashi ya koondjambi dhokomwedhi. Out na okusimaneka eliko lyoshilongo, oshoka omaliko ogoshigwana,” ta popi ngaaka.
Ta indile oominista dhi simaneke oompango nomalandulathano goshilongo oshowo oshigwana.
Omupevipresidente Kanu Peter Amadhila esiku ndyoka okwa ti, ehangano lyoNaloba otali indile epangelo opo lyi kaleke edhiladhilo ndyoka.
“Otandi endulula epopyo lyandje nde li popya nale kutya, Naloba ke li ompinge nakwiilongo taya ningi oongeshefa moNamibia, ihe naya ninge oongeshefa ndhoka Aanamibia itaaya vulu okuninga,” ta ti ngaaka.
Ta gwedha po ta ti, ompito ndjoka nayi gandjwe ashike kaanangeshefa yAanamibia okupitila mehangano tali ya kalele po lyoNaloba, netompelo lyoku eta po oompito dhiilonga oshowo okukandula po ondjala moshilongo oshowo okuhumitha komeho eliko lyoshilongo.
“Itatu pitike nando aakwiilongo ya pewe ompito ndjoka omanga aanangeshefa Aanamibia nayo taya vulu noye na oonkondo dhokulonga iikunino yiikwamboga,” ta nyenyeta ngaaka.
Ta ti, epangelo lyaNamibia olya pumbwa okundhindhilika kutya eliko moshilongo ohali humithwa komeho kaanangeshefa onkene oya pumbwa okupewa oompito ngaashi naanaa ndhoka omanga inadhi gandjwa po kakwiilongo.
“Otandi gandja oshiholelwa shoshikunino shoAsparagus, shoka sha kwatelwa komeho kaakwiilongo, shi li kEtunda moshitopolwa shaMusati,” ta popi ngaaka.
Ta nyenyeta kutya, Aanamibia otaya mono iihuna, taya futwa oondjambi oonshona, kaye na nando uuwanawa washa haya ningilwa, naashoka okwa ti kasha li nando mondjila.
Amadhila okwa ti, ehangano lyoNaloba olyi lile po okukwathela aanangeshefa Aanamibia oku ya kondjelela omawunawa oshowo okuhumitha komeho eliko lyoshilongo.
Naloba natango okwa li a pandula omupresidente goshilongo Hage Geingob oshowo aaleli ayehe sho ya tsikile nokwiitula mo mokuxwaxwameka nokuhumitha komeho oshilongo momikalo dha yolooka.
– vkaapanda@nepc.com.na