Mbinga politika zaRally for democracy and progress, president gwazo Jeremia Nambinga katente asi mbunga zendi ngazihafera kweyi garugana Hidipo Hamutenya, omu gavapauhura komeho vadive asi mbunga mpangeli zaSWAPO kuvaka mazwi gomahoroworo. Ano age yiyo nye kahundilire asi Hamutenya gahepa kuhundira mbunga zaSWAPO asi zihageke kuvaka mazwi gomahoroworo, apa ngesi age ana tengura nye kombunga ezi gakere asi age ngatanta asi mbunga ozo anatengura kwayidiva kuvaka mazwi gomahoroworo.
Edi kadikere nonkango daNambinga ogu kakere tauyunga noruhafo, nokudiva asi mukwawo zendi gakere ngesi ana musigi ana tengura kombunga zaSWAPO. Hamutenya kwatundire mombunga zaSWAPO, mo 2007, nokukatotapo mbunga ozo ana kasiga hena. Hamutenya kwakere gumwe gomutaro mosiruwo sokutotapo mbunga ezi zaRDP, age kwatente asi eyi yamuninkisire atunde moSWAPO, morwa kwakeremo yimpempa ntani maligazarero siruwo sina.
Age kwakere presidente gwaRDP, dogoro kambunga kamwe kakatokwere asi aw okapi vana kumuvatera hena, nokumuhundira asi gahepa kuhageka mokukara asi yige president. Awo kwamutangwisire asi epiro lyawo lyokupira kutomporo morwa umpitisili woudona ou gakara nawo mwene mukondi gwawo. Nambinga katente asi kutengura kombunga zaSWAPO, hawe ngoso ove kuna tura nye nonkango edi garugane Presidente gwanare gwaSWAPO, Hifikepunye Pohamba, ogu gatente mo 2008, asi yilyo yaSWAPO vanazi koRDP, kuna kara tupu ngwendi Judas ogu garandesere Jesus. Nsene nayina nitunda moRDP nize kombunga zaSWAPO, hawe ngoso ninatambura asi eyi gatente Pohamba usili. Ngapi nayimoneka asi nyame natanterere vantu vatunde mombunga zaSWAPO, asi morwa mbunga zina ndona, nayina nitengure. Nambinga nage kayimuzuvhikire asi kuna hara kutengura kombunga zaSWAPO.
Age katente asi mbunga zendi RDP kapi zina yigumu yokutunda Hamutenya moRDP.Kutundamo moRDP kwaHidipo kapi yina kutanta asi ehagero lyaRDP. Ose tuna hafa morwa gatumahwire komeho apa gatutanterere asi SWAPO kuvaka mazwi gomahoroworo. Ngesi tuna hafa hena morwa apa anakutengura nakatantera mbunga ozo ana tengura asi vahavaka hena mazwi. Yimo ana kutanta Nambinga. Mo 2009, mbunga zaSWAPO kwatuliremo marapoto asi nonkango odo ana kuruganesa Hidipo kapisi dousili. Nambinga simpe kuna kurugurura asi kapi yina vatetura yokutengur kwHamutenya kombunga zaSWAPO. “ Nkenye gumwe yamumangurukira kutundamo ndi kuwiza, yipo nye asi Hamutenya kuyimufumadekera oyo ana rugana neyi garugana. Ntani ose tuna hafa kweyi gayatoterepo mbunga ezi zaRDP, mbunga ezi zina kara asi vamwe ngesi yina tutamba mokuzigendesa. Nokutara asi nayinye eyi yakere asi nzodi zetu yize moyirugana. Nambinga kaperepo asi age kapi ana kugazara kutengura kombunga zaSWAPO, morwa mbunga ezi zaRDP, ose vamwe kuna kuzimona ngwendi moomu zatamekere mo 2007.