Omukulunhuwiliki wouhaku moshitukulwa shaShikoto Joshua Nghipangelwa okwa ti oshidu shomalaria onghee tashi twikile nokulopotwa komikunda da yooloka eshi neudo ovanhu 55 va monika oshidu shomalaria omanga omunhu umwe okwa fya koshidu osho, neudo koshipangelo shaTsumeb.
Nghipangelwa okwa ti neudo momwedi Januali omwa lopotwa ovanhu vahapu va kwatwa koshidu shomalaria okufaafanifa nomudo wa dja ko eshi kwa li mwa lopotwa ovanhu 22 va monika omalaria.
Okwa ti unene tuu pefimbo eli lodula fiyo omwedi Mai okwa didilikwa ovanhu hava kala va ninga oihakanwa yokukwatwa koshidu shomalaria eshi hava kala tava lika keemwe tadi di momwiidi ile moimbodi.
Pefimbo a ninga eenghundafana naKundana Nghipangelwa okwa hokolola ta ti oshiwana nashi kale tashi lopotele omandiki ouhaku pefimbo ngeenge tashi ulike omadidiliko amalaria opo shi kale sha mona omayakulo opauhaku diva.
“Ngeenge omunhu okwa mono epango pefimbo, ohashi kwafele ovanhu ve na oshidu malaria opo va veluke diva nokukelela yoo vali omafyo shaashi malaria okwa nyika oshiponga naye ngaashi naanaa omikifi da yooloka,” Nghipangelwa ta ti.
Omukulunhuwiliki wouhaku okwa hokolola ta ti malaria oha tandavele okudja komunhu nomunhu eshi ngeenge omunhu a lika komwe, ohai dulu oku ka lya ovanhu vahapu pefimbo limwe onghee eshi ohashi tandeveleke malaria noupu.
“Ombelewa youhaku oya ninga eenghendabala dihapu okukondjifa malaria eshi twa kala nokuyandja ehongo momikunda nghee oshiwana shi na okukala she liamena kumalaria,” Nghipangelwa ta ti.
Okwa ti ovanailonga vouhaku ova pombelela omaumbo ayeshe komikunda kwa monika malaria opo kukelelwa etandavelo loshidu osho.
“Oshikondo shouhaku mOshikoto oshe lilongekida okukala sha kondjifa oshidu malaria eshi sha kala nokutopolela oshiwana eenete dokukelela eemwe,” Nghipangelwa ta ti. Okwa ti oshiwana nashi kale tashi longele kumwe novanailonga wouhaku ngeenge tave u ya okupombela momaumbo avo.
Okwa kunghulila oshiwana opo shi kaleke po eenhele davo da yela efimbo keshe, novadali opo va kwashipaleke kutya ounona vavo ove li mefiloshisho okukala va tuvikilwa meenete dokukelele eemwe.