Omunashipundi gosenda yopreyeka Hage Geingob, Omuprofesa Peter Katjavivi ngoka kwa li nale omuwiliki gwegumbo lyopashigwana okwa talelelepo omupresidente gwoshilongo Netumbo Nandi-Ndaitwah nelalakano lyo ku mu tseyithila noku mu fatulilila mpoka pwa thikama oproyeka nena.

Sha ikolelela komushangwa gwa pitithwa kombelewa yOmupresidente, Katjavivi okwa fatulula kutya oproyeka ndjoka oya totwa po owina okugongela nokupungula uuyelele awuhe osho wo iilonga ya longwa komupresidete omutitatu Geingob.

“Okwa tseyitha kutya oproyeka ndjoka otayi kala nokugamena, okupungula osho wo okuulika esimano lye okupitila momishangwa ndhoka. 

Omishangwa ndhoka otadhi ka totha mo nkene a kala nokukondjela emanguluko lyoshilongo shika sigo ethimbo a kala noku shi longela sho sha manguluka osho wo omauwanawa e ga ningile oshigwana,” ya shanga ngaaka.

Katjavivi okwa thindi omuthindo kutya etompelo okusimaneka shoka sha pondolwa kuGeingob moNamibia osho wo kiilonga yilwe sho a kala nokulonga omolwuuwanawa wonakuyiwa osho wo methimbo lya pita nale.

Omushangwa ogwa lesha kutya omutse gwoshilongo Nandi-Ndaitwah okwa li a pandula Katjavivi kenenedhiladhilo ndyoka ye ya po nalyo, ta ti oproyeka ndjoka otayi ka dhana onkandangala onene kAanamibia ayehe.

“Oproyeka ndjoka otayi ka kala 

ya humbata ondjokonona onene kombinga yoshilongo shika osho wo nkene Geingob a kondjele nokulongela oshilongo shika, onkene otashi pandulwa noonkondo,” ta pandula ngaaka.

-vkaapanda@nepc.com.na