Auleria Wakudumo

Ovalumenhu vatatu ova xulifa eshi va kwatwa koluvadi moiningwanima ivali ya yooloka moshitukulwa shaKavango East, Kavango West osho yo Ohangwena. 

Oshiningwanima shimwe osha ningilwa komukunda Ntara moshikandjohoololo shaMusese moshitukulwa shaKavango West, sha ningwa Olomakaya lwopotundi 14h00. 

Shimwe osha ningilwa moDivundu moshitukulwa shaKavango West sha ningwa Etitano lwopotundi 17h50. 

Omanga oshiningwanima shikwao sha ningilwa momukunda Oshiti shaHaihonya moshitukulwa shaHangwena sha ningwa Etitano lwopotundi 16h00.

Oonakufya ova tongololwa ovo Rarufa Munango omukulunhu weedula inadi didilikwa, Marando Dikoro weedula 56 osho yo okaana keedula 13 Joseph Kandjila. 

Eshi osha kolekwa komupopiliko omukulunhu wopolifi moshilongo Kauna Shikwambi. 

Otaku hokololwa Munango a kwatwa koluvadi omanga a li ta lifa eengobe. 

Dikoro otaku hokololwa e lituwa a xulifa koshi yomuti konima eshi a kwatwa koluvadi. 

Omanga olutu laKandjila le lituwa li li koshi yomuti. 

Oshiningwanima sha yooloka, ovalumenhu vatatu ove likufa omwenyo mexuliloshivike. 

Olopota yopolifi oya holola kutya Israel Mwashekele (42) okwa xulifa eshi e likufa omwenyo molukanda Goreangab moWindhoek sha ningwa Etitano lwopotundi 11h30. Otaku hokololwa olutu laye le lituwa meumbo laye. 

Oshiningwanima sha faafana, omulumenhu weedula 23 okwa xulifa eshi e likufa omwenyo.

Opolifi oya holola kutya oshiningwanim eshi osha ningilwa momukunda Okatope moshitukulwa shaHangwena sha ningwa Olomakaya lwopotundi 12h00. 

Nakufya okwa tongololwa oye Nghilifavali Ngube. 

-awakudumo@nepc.com.na