Rudolf Gaiseb
!Nakaǂnôa ministers ǀgapi ǁgau!nâ-aos dis, Natalia ǀGôagoses ge ǂoa ge wekheb di DEnstaxtsēs ge ǂanǂan, Namibiab Studentn Marisihuib ǂGaes (NSFAF)!aruǀî hōǂgās ai !gao!gaosase ǂganamsende kōǀî tide marisihuib !aroma !khaisa.
Nēs ge ra ǂâibasen hoa ǂganamsenaon ǀguitikō !ēsa nî ūhâsa, ǀgora-i a ǀkhaise. 2025ǁî kurib di NSFAFs online nî dīhe ǂganamsendes ǂhaitsise gere ǁkhowa-am soab ais ge ministersa ge mî, NSFAFs di ǁkhawa kō!gâsa xoaǁguib, daoǁgaub ase nî sîsenni, ǂguro ge ǀgâsa studentna ai!hūba gere ǁam kais nēsi hoa khoen ǂgaoǀkhādi ai ra dīǀoaǀoan !aroma a ǁkhowa-amsa !khaisa.
“ǁGūbas ge hoa Namibiaǁîna ǀgapi ǁgau!nâsa sī!nâ kaisa,”tis ge gere mî.
Popular Democratic Movements (PDM) parlements ǁanib, Maximilliant Katjimuneb ge nē ǀasa ǀgauba ra ǁkhoreǁhare tsî mî, mario!nâ ǁgau!nâs di ǁgūbas nēs !nâ-ū ra ama kaihe !khaisa.
“ǂGom!gâ ta ge ra nēs ǂgiǂgosi aiǁama tama hâsa, !kharu ge ǁaegu !nâs ge nē ǂGaesa !haese mîmâide gere dī, dīǀoaǀoahe tama gere īde, mariǁhōn ministeri ǀams ai mari-I a ǀkhais di ǀhapio kaisens ǀkha hoana gere dāǀarise.
ǁNā-aman ge hoa daoǁgaun tsî xoaǁguina nî ǂhomisa, mariǁhōn tsîna !khōǂgā hâse,”tib ge Katjimuneba gere gonǀgon!gao.
ǂOa ge kurib !nâs ge nē ǂgaesa 31 144 ǂganamsende ge !khō!oa hâ i, Nēna xun ge 8 805 ge ǂharahe ǀnî khami I !aroman !aroma tsîn ge !gau ge 22 339 (72%) !gâi!gâ tsî nē ǂgaesa xu ge ǀamma.
Nē !gâi!gâ gena xu di ge 12 924 (58%) tarekhoe tsî 9 415 (42%) aorekhoese ge i. ǁKhaǁkhāsens di !harigu ǂnamipe i ge 16 063 (72%) studentna ǂguro xrati !aroma, 5 970 (26.7%) studentna Texnise tsî !Omkurus ǁGau!nâs (TVET) !aroma tsî ǀuniga 306na !aruǀî hâ ǁkhāǁkhāǂuisendi !aroma.
NSFAFs di ǂnûǁkhaeba ra dana sîsenǂuira mâisab, Kennedy Kandumeb ge ge mî, ǂoa ge kurib !nâns ge ǂgaesa N$2.5 biljuns mariǂnûiǂuis ǀkha 53 793 ǀasa studentn tsî !kharu!kharu ran tsîn hoana ge hui ǁkhā.
Nēs ge 18.3% ǀkha ge ǀarosen !gôab, ǁnāpan ge 2023ǁî kurib !nâ 45 464 studentn ǀguina hâ is khao!gâsa.
Nēsin ge NQF 5ǁî !harib ai sertifikatgu !aroma ra ǁkhāǁkhāsen student tsîna NSFAFsa xu nî domdore.