OSHAKATI – Uuministeli wuuhaku nonkalonawa otau hiya aakiintu ya longithe ompito ndjika oku ka konaakonwa okankela yokoshivalelo.
Omwedhi nguka ogwa tseyika gokulwitha nokugandja omalongo kombinga yokankela yokoshivalelo. Uuministeli owa tseyitha wo kutya okupitila miipangelo ya yooloka moshilongo oye li metifa okuninga omakonaakono oshali. “Otatu hiya oomeme okuza pomimvo 20 sigo 49 ya ka ningilwe omakonakono oshiwike shika osho wo shoka sha landula ko,” ya nyola ngaaka.
Okwa lopotwa kutya aantu ye thike konyala 200 ohaya hulitha omumvo kehe komukithi gwokankela. Omupeviminista muuministeli wuuhaku nonkalonawa Esther Muinjangue okwa ti aakintu ye li 230 ohaya monika omukithi gwokankela yokiilyo yiivalithi omumvo kehe. Ta ti, nonando Namibia a li a konakona okankela aantu ye vule 138 000, okuza mo2018, natango omwaalu ngoka itagu etitha omukumo oshoka oyendji natango inaya konakonwa.
“Oshigwana nashi kuthe ombinga momakonakono gomukithi gookankela yokiilyo yiivalithi, ngoka taga ningwa oshali miipangelo yepangelo,’’ ta kumagidha ngaaka.
Okwa indile wo Aanamibia ya kale aluhe haya ki ikonaakonitha okankela, ihe hapaife ashike.
Muinjangue okwa gwedha po wo kutya okankela yokomagundji nokankela yokiilyo yiivalithi oya nika oshiponga, ihe ohashi kwathele uuna ya monikila ko.
“Okankela yokiilyo yiivalithilo ohayi vulu okupangwa, nohayi vulu okukeelelwa,” ta yelitha ngaaka. Oshihwepo kehe gumwe a ye komakonakono opo a kale e shi mpoka a thikama kombinga yokankela.
Oondohotola ya yooloka oya kala nokukumagidha oshigwana shi kale tashi ikonakonitha omikithi dhookankela adhihe. Omaludhi gookankela ngoka gi igalala moNamibia, omwa kwatelwa okankela yoshipa, yokomagundji, yokiilyo yiivalithi, yomomuligu noyokomandjandja.
Okwa lopotwa kutya, okankela ohayi etwa kiikulya yimwe, komakaya, komudhingoloko, koonte dhetango, kekako nokelongithonayi lyiikolitha nosho tuu.