Kakukutu kopolifi yaNamibia Inspector General Joseph Shikongo okwa popya ta ti opolifi oye lilongekida okutula po elandulafano nombili moshilongo pefimbo leefya domukokolipresidente.

Edi Shikongo okwe di popya Omaandaxa pefimbo a talela po koshuumbo shaNujoma koWindhoek.

Okwa li a enda pamwe novanambelewa vopolifi. Okwa ti opolifi otai ka longa nondjungu okuamena ovanhu tava di kondje yoshilongo ovo tave uya keefya danakufya Sam Nujoma. Kakukutu komatanga opolifi okwa ti oshiwana nashi lihumbate nawa pefimbo eli lokulila Nujoma.

“Ovanhu inava pumbwa okulonga oimbuluma molwaashi itashi ulike efano liwa kovatalelipo,” ta ti.

Okwa kumaida oshiwana opo shi fimaneke omafiku okulila Omukokolipresidente. Etivali ouministeli wovanyasha nomaudano owa pitifa omukanda kutya kape na omaudano noshoyo oivilo yomalihafifo yomangudumano fiyo Nujoma a fudikwa. 

-fhamalwa@nepc.com.na