Ofitola yomukwashiwa omuChina oya ponokokelwa kookalyamupombo ve li va hamano mwa kwatelwa omukainhu umwe Etine efimbo lokomatango lopotundi 16h45 kolukanda Mondesa modoolopa yaSwakopmund.
Opolifi oya hokolola tai ti mofitola omwa kufwa yoo vali oinima ngaashi eengodi doshinanena doIphone 6 neengodi heyali doHuawei.
Oinima aishe ya kufwa mo mofitola oili pongushu yoshimaliwa N$113 000.
Omupopiliko wopolifi moshitukulwa Erongo inspector Ileni Shapumba okwa ti ovafekelwa okwa li ve na oilwifo ya nyika oshiponga ngaashi eendjabo nomakatana.
Okwa ti ovafekelwa vati eshi veya meni lofitola ova lombwela omunailonga opo a nangale pedu nokonima ova nukila mwene wofikola ndele tave mu minifa oshiponga nomakatana.
Nakuninga oshihakanwa omulumenhu weedula 41 nokuli moshipangelo shaSwakopmund ta mono epango lopaunamiti.
Kapena omufekelwa okwa twa po natango yoo noinima ina i monika fiyo opapa.
Opolifi otai indile moshiwana kwau e na ouyelele kombinga yovafekelwa ava opo a kwatafane nomupedu Commissioner Erastus Iikuyu 0812464757 ile oshiwana shi lopotele opolifi keshe ili popepi.
Opolifi oya kunghulila oshiwana opo shi ha lande oinima oyo yava kwa.
Ovafekelwa ova fanekwa moufano ovo ve li mofitola onghee omafano avo otaa ka yandjanekwa moshiwana opo shi kale sha yandja ouyelele kombinga yomadina ovafekelwa.
Omakonakono opolifi otaa twikile. – fhamalwa@nepc.com.na