ONGWEDIVA – Naftal Nehemia Uushona okwa ti okuudite etumba okulongifa ounongo waye eshi paife ta hondjo omaludi oikutu nokukala ta longo oshimaliwa shaye.
Omulumenhu ou okwa ti okwa tameka okuhondja omudo 2010.
“Etameko kala li lipu shaashi okwa li nda taalela omashongo okulanda omashina nosho tuu. Paife ohandi pandula Kalunga shaashi ongeshefa yange oya xuma komesho,” ta ti.
Uushona okwa hokolola ta ti okwe lihongela okuhondja koshiputudilo shopaungomba shoNIMT.
Okwa ti paife osha pumba okumona omulumenhu te lihongele okuhondja shaashi vahapu ova itavela kutya oomeme ovo hava i kofikola yokuhondja.
“Okuhondja oshinima shimwe nda putuka ndi shi hole unene, naashi osha eta opo ndi mone omhito yokuya kofikola ndi ke lihonge okuhondja,” ta ti.
Okwa weda po ta ti okwa hafa shaashi okwa hanga ondjodi yaye shaashi paife oku li dingi mokuhondja oikutu mOngwediva.
Okwa hokolola ta ti oha hondjo oikutu ngaashi omanguwo, oikutu yovakainhu ya yooloka, omidjalofikola nosho tuu.
Uushona okwa ti ongeshefa yaye yokuhondja oya lundulula onghalamwenyo yaye molwashi paife oha dulu okuyambidida ofamili yaye osho yo okufutila ounona vaye ofikola.
“Onda pandula shaashi oshi dulife omunhu e li meumbo ehe na eshi ta ningi. Omunhu tete o tamekele pedu fiyo to ende wau ka pombada ngaashi naana ame nda tameka nda taalela omashongo aahapu,”ta ti.
Uushona okwa ti ngeenge owa i koshihondjelo shaye ota hangeko oikutu yovanhu i li momukweyo ya teelelwa okuhondjwa.
Okwa ti okwa taalela omashongo ovanhu vamwe ihava futu pefimbo ile omunhu taa eta oshikukutu shihondjwe ndele okwe shi hala pefimbo opo.
“Eshi omunhu to mu lombwele kutya okwa hanga po nale oikutu yavakwao i li momukweyo oha tameke ta tanguna. Oshi li eshongo linene,” ta ti.
Uushona okwa kumaida ovanyasha vakwao opo vaye koiputudilo yomaungoba ve ke lingele okuhondja ile okupangela nokuhonga oipalangi nosho tuu.
“Onda pandula epangelo eshi la tota po oiputudilo yopaungomba shaashi otai yandje ounongo kovanyasha. Eshi otashi kwafele okulwifa ondjala noluhepo nokueta po eemhito,” ta ti.
Ota monika konomola yongodi 0816339603, oku li mOngwediva.