Omukulunhu wouhaku moshitukulwa shaShikoto Josua Nghipangelwa ota ti oipangelo yomoshitukulwa shaye oi li momhumbwe yoikwafifo yoCovid-19.
Meenghundafana a ninga naKundana Nghipangelwa okwa hokolola ta ti oipangelo yomoshitukulwa shaye oya pumbwa oikwafifo yoCovid-19 ngaashi omanyala, noikutu yokudjalwa kovanailonga vouhaku ngeenge tava longo novanhu va kwatwa kombuto yoCovid-19.
Okwa ti oshi li eshongo linene shaashi ovanailonga vouhaku ohava longo ve na oumbada eshi va tila okukwatwa kombuto ei. Onghee Josua okwa ti okwa lopotela epangelo kombinga yoshikumungu eshi shoikwafifo inai wana moshitukulwa Oshikoto.
“Okwa didilikwa yoo vali nokoupangelo vashona ava ve li komikunda ve li momhumbwe yoikwafifo yoCovid-19. Onghee ohandi indile opo omahangano opaumwene ile ovanangeshefa opo va yambidide oshikondo shoministeli wouhaku nokuyandja oikwafifo ei i li ya pumbiwa pefimbo eli oshilongo shi li moudjuu wombuto ei tai dipaa ovanhu,” Nghipangelwa ta ti.
Okwa popya ta ti ovanailonga vouhaku ova fimana shaashi otava longo oshilonga shinene shokukala tava tonatele ovanhu ve li kepango loCovid-19. Onghee okwa hokolola ta ti oshiwa ngeenge ova amenwa komukifi ou shaashi eyakulo lavo olapumbiwa natango.
Nghipangelwa okwa weda po tati oshitukulwa shaye oshi na vali omhumbwe yoyeendifo ina i wana ngaashi etuwa dokutwala omiti ile oilongifo koupangelo vokomikunda. Onghee eshi vati oshi li oupyakadi tau dana onghandangala moshitukulwa shaye.
Okwa ti ova wapaleki navo ova pumbwa oikwafifo ngaashi omanyala opo va kale veli amena ngeenge tava longo keeshala dovanaudu.
Okwa kunghulila oshiwana opo shi twikile nokuliufa komilandu doCovid-19 efimbo keshe.