Auleria Wakudumo
Minista wouhaku nonghalonawa, Dr. Esperance Luvindao okwa holola kutya oipangelo yepangelo, mwa kwatelwa oupangelo vanini otava ka twikila okukwafela ovanaudu pefimbo lomusha ile pomeetaxa.
Minista okwa ti oipangelo itai ka pitikwa vali i kale ya fiya ovanaudu momikweyo manga va ya vati va ka lya omusha.
Luvindao okwa ti okwa ninga etokolo eli opo ouministeli u wanife po eudaneko eli va ningila oshiwana okukwashilipaleka kutya keshe Omunamibia okwa mona ouhaku wopombada u na ongushu efimbo keshe.
“Ohandi indile oipangelo aishe i kale ya tula moilonga omulandu nghene ovapangi neendokotola ve na okukala tave lipe omalufo okuya pomeetaxa. Ovapangi novanambelewa aveshe vouhaku ova pumbwa okukala tava yakulafana okuya povili yefudepo opo mu kale vamwe moilonga efimbo alishe,” Luvindao ta ti.
Luvindao okwa weda po ta ti eshi otashi kwafele okukwashilipaleka kutya ovanaudu ova yakulwa efimbo alishe.
Minista okwa holola yo kutya ovapangi neendokotola osho yo ovanambelewa vamwe vouhaku nava kale alushe ve lilongekida okukwafela ovanaudu efimbo alishe.
“Ouminsteli wouhaku otau ka kwashilipaleka kutya oipangelo yakula noipangelo inini moshilongo oya landula omulandu ou wa tulwa po kouministeli,” Luvindao ta ti.
Luvindao okwa ti kutya ouministeli otau ka katuka onghatu yopombada kwaavo itave ke liufa komulandu wa tulwa po.
“Osha fimana okukwashilipaleka kutya otwa yandja omakwafo kOvanamibia efimbo alishe shaashi ovakwashiwana vahapu ove likolelela koipangelo yepangelo,” Luvindao ta ti.
Oipangelo tai longo efimbo alishe otai kwafele yo ovanaudu ovo hava shunifwa komaumbo shaashi kwa toka ile vati oondokotola vehe po.
Ovanaudu vamwe ohava tavakana eengoya va uka koipangelo unene tuu oipangelo ei yakula yepangelo ashike oto hange paemhito dimwe omunhu ta shunifwa ko shaashi vati la toka opo a aluke mongula a mone epango.
Oshinima eshi itashi tu kumwe nelalakano louministeli wouhaku moNamibia.
Elalakano louministeli wouhaku okukwashilipaleka kutya keshe omunhu okwa mona ouhaku wongushu nowopombada efimbo keshe moNamibia.