Okaana ka fya omeva eshi kwa li ta ka kwata omafuma

Okaana Kokamati keedula 8 oka fya eshi ka wila momeva pefimbo kwa li tava kwata omafuma nav kwao Osoondaxa efimbo lomutenya potundi 15h00 kolukanda Sky modoolopa yaNgwediva.

Nakufya okwa tongololwa oye Johncal Ambambi omukalimo womOngwediva.

Omupopiliko wopolifi moshitukulwa shaShana Inspector Thomas Aiyambo okwa hokolola ta ti ounona okwa li tava kwata omafuma ve li vavali melambo lonyata.

Okwa ti kaume kaAmbambi ou kwa li tava kwata naye omafuma okwa hokololela opolifi ta ti eshi a mona kaume kaye ta ningine koshi yomeva okwa li ta kendambala opo ngeno e mu kufe mo momeva ashike naye okwa nyengwa shaashi naye okwa li e na oumbada wokuwila momeva.

Kaume kaAmbambi okwa lotoka opo a ka lombwele vomeumbo li li popepi nonhele oyo kwa li tava kwatele omafuma kutya kaume kaye okwa wila momeva.

Eshi ovanhu va fika ova hanga nale Ambambi e li koshi yomeva onghee ova kendambala opo va lopotela opolifi diva.

Opolifi eshi ya fika oya kufa mo olutu laAmbambi novakwapata vaye ova shivifilwa efyo laye.

Opolifi oya kunghulila ovadali opo va kale tava lombwele ounona vavo va xulife po okuya keenhele odo di na omeva shaashi okwa didilikwa efimbo eli lodula ounona vahapu ova ninga oihakanwa yokufila momeva.

– fhamalwa@nepc.com.na