Okanona komimvo 12 hoka ka kala taka sile oshimpwiyu omukulupe gwomimvo 90 nasha, oka tamekithwa osikola omwendhi gwa yi pOniipa Primary.
Risto Johannes okwa kala nomukulupe komukunda Onamungundo moshitopolwa shaShikoto hoka kwa li ta tekulwa, nokwa kala ta yambidhidha omukulupe nokuteleka okumuyoga oshoka ita vulu okwiilongela iilonga mbyoka kuye mwene.
Johannes okwa li a kuthwa ko komukulupe hoka ali ta tekulwa, no kwa li a falwa komulupe, ngoka a vala yinakulu, komukunda Oshaakondwa moshitopolwa shaShikoto.
Ehokololo ndyoka okwa li lya etwa pu wa yele konima omushiinda gwe Jesaya Nambundunga kwa li atsakaneke okanona hoka kena iilalo omutse aguhe nezimba ta li zi momutse.
“Onda li nda pula kutya oshike okanona ke li monkalo yi li ngaaka, no kwa li nda hokololelwa ehokololo alihe ku gumwe gomaakwanezimo. Okwa li nda kapangitha Johannes meendelelo,” ta hokolola.
Ta ti, nonando a li ena okukala a kwatela moombete esiku ndyoka, okwa li nda indile aapangi opo ndi kale tandi mumangulula kegumbo, shoka kwa li sha ziminwa sigo a kala po nawa.
“Okwa li nda kaninga eyindilo kosikola Oniipa primary hoka kwa li ataambwa meendelelo, omwedhi gwayi. Nonando Johannes ka kwa li eshi opena sho hayi kwatwa, mongaaashingeyi okwashuwa okushanaga endhina lye,” ta popi ngaaka.
Ta gwedha po ta ti, uupyakandhi hawo ashike mboka, Johannes ogumwe gomaanona ye li 14 taya hupile mopenzela yomukulupe gwomimvo 97.
“Maanona moka natango omuna okanonakandhona hoka kena omagano mosikola, ihe onkalo yo megumbo itayi hokitha, otayi vulu okushololitha omunona ngoka athige po osikola,” ta popi ngaaka.
Ta ti, egumbo ndyoka lyomukulupe lyi li molukanda Oshaakondwa moshikandjohololo shOniipa, nonando lya gongaleka aatekulu, oyana oshowo aatekulululwa kapena nando ogumwe ena iiyemo yasha.
“Oyendji yomaatekulu mboka kayena uuthemba woshilongo, omolwa oohe kaayepo, onkene itaya vulu okushangithwa omayambindhindho gaanona ye li moluhe po. Megumbo moka omuna aanona okuza pomwendhi gumwe sigo opo mvula 14,” ta ti ngaaka.
Ta hokolola ta ti, egumbo ndyoka kalina omeya oshowo okandjugo, ano uuyogoki owu yali ko kule.
“Oyendji kayena iikutu oongaku oshowo omakumbatha unene pethimbo ndika lyuutalala,” ta popi ngaaka.
Omukulupe ota indile oshigwana opo shi muyambindhindhe poompito mpoka tadhi vulu, omolwa onkalo ataalela.
Kansela gwoshikandjohogololo shOniipa Tuuli Nuunyango okwa ti, onkalo yomegumbo moka okuyushi lela.
“Omvo gwayi okwa li ayambindhindha nooshako dhuusila, iilya oshowo iikulya yilwe, iikando itatu,” ta ti ngaaka.
Ta ti, aanona mboka kaayena uuthemba womavalo, oya etelwa uupyakandhi kooyina.
“Oopelesenta dhaantu ye vule 49% moshikandjohogololo muka kayena uuthemba, yamwe ohaye wu kongo una ye li po kuthika mepipi lyopenzela,’’ ta popi ngaaka.
Ta gwedha po kutya, ombelewa yawo otayi vulu okuyambindhindha aanona mboka opo ya mono oonzapo ndho mavalo, ihe opena oompango handhi landulwa.
– vkaapanda@nepc.com.na