Auleria Wakudumo 

Cuba okwa dimbuluka pambelewa Omukokolipresidente Sam Nujoma omafiku avali, okudja Omaandaxa po 06h00 fiyo oufiku wonghela Etivali omanga oilongo ihapu mounyuni oya hokolola nakufya ongomufindani nomuleli waaveshe. 

Omupresidente waCuba, Miguel Diaz-Canel okwa holola ta ti edimbuluko laNujoma ola ningwa moCuba aishe. 

“Oule womafiku atatu, omapandela peembelewa adishe depangelo osho yo peembelewa domatanga eameno oshilongo ashishe okwa kala a tulikwa oitata,” Diaz-Canel ta ti. 

Diaz-Canel okwa weda po ta ti Nujoma okwa li e hole Cuba nokwa kala nokulonga noudiinini okukwatela po ombili pokati koilongo ivali – Cuba naNamibia – fiyo opaife. 

“Oshilongo shetu otashi kala nokupandula Sam Nujoma eshi e tu kwafela paemhito dihapu,” Diaz-Canel ta ti. Ovaleli vahapu okudja koilongo ya yooloka navo ova tumbaleka nokudimbulukwa Nujoma molwoilonga a longa youleli oyo tava ti itai dulu okudimbiwa.

Omupresidente waTanzania Samia Suluhu Hassan okwa holola eudonai laye kefyo lomukokolipresidente. 

“Omukondjelimanguluko, omukwateli kumwe wAfrica nakaume muwa kaTanzania omo kwa li had i oshikando shimwe pefimbo loita yaNamibia. 

Nujoma okwa kala omupiya woshiwana, oshinima osho inashi kwafela ashike emanguluko loshilongo shaye ndele osha kwafela yo oilongo ihapu okukufa omukumo nomatokolo okulwifa ovatondi vavo,” Hassan ta ti. 

Omanga omupresidente waSouth Africa Cyril Ramaphosa a yandja omahekeleko aye kOvanamibia. 

“Ongovashiinda, South Africa naye ota lili pamwe nOvanamibia ovo va kanifa omuleli wavo muwa oo a dana onghadangala mondjokonona yekondjelomanguluko loshilongo Namibia,” Ramaphosa ta ti. 

Omupresidente waZambia Haikande Hichilema naye okwa holola ta ti okwa uda nai kefyo laNujoma oo ta tumbaleke ongependafule, nomukokolipresidente waNamibia. 

Omupresidente waZimbambwe Emmerson Mnangagwa okwa ti ounyuni owa kanifa omuleli nomukondjelimanguluko waAfrica. 

“Otu udite nai kefyo lomuleli wetu ashike otu na okutwikila okulongela kumwe noilongo yetu moSADC, oyo a tota pamwe novaleli vakwao manga ina hanga emanguluko loshilongo shaNamibia nokuli,” Mnangagwa ta ti. 

Omukwaniilwa waBritain Charless III okwa holola momukanda wa pitifwa Osoondaxa kutya ovakwanedimo osho yo oshilongo shaye ova uda nai kefyo laNujoma. 

Charless III okwa weda po ta ti oukwatya wouleli waNujoma okudja mekondjelomanguluko fiyo osheshi a findana nokuninga presidente wotete woshilongo oule weedula 15 otau dimbulukwa mounyuni aushe. 

Namibia oku na ekwatafano liwa naBritain nohandi dimbulukwa eshi meme, Queen Elizabeth II a li eya okutalela po oshilongo mo1991. 

-wakudumoauleria@gmail.com