Auleria Wakudumo 

Ovanafikola vavali hava fikola posekundefikola yaTsumkwe moshitukulwahoololo Otjozondjupa ova xulifa moshiponga shotuwa omanga 18 tava mono epango lopaunamiti. 

Eshi osha kolekwa komupopiliko wopolifi moshitukulwa shaTjozondjupa Senior Inspector Maureen Mbeha ta ti oshingwanima osha ningilwa mokapate komamanya kaMangeti mOmaandaxa lwopo 09h20. 

Oonakufya ova tongololwa ovo Frans Chameia weedula 19 osho yo Elizabeth Kambara weedula 18. 

Mbeha okwa holola ta ti omushingi okwa nyengwa okuukililifa otuwa osho sha eta otuwa i we kokapate nokudipaa ovanafikola vavali. 

Olopota yopolifi oya holola kutya motuwa omwa li ovatwaalelwa 23, mwa kwatelwa omushingi. 

Ovatwaalelwa vahapu va li motuwa vati ovanafikola vali tava alukile kofikola okudja kefudiko kOmangetti mexuliloshivike. 

“Umwe okwa xulifila poshiningwanima, namukwao okwa ka xulifila kokapangelo kashona kaTsumkwe,” Mbeha ta ti. 

Mbeha okwa weda po ta ti ovatwaalelwa 18 otava mono epango lopaunamiti mokapangelo kaTsumkwe. Ovatwaalelwa ove na eedula 48 fiyo 06. 

Efiku olo tuu olo, oambulansa imwe yo-MVA Fund oyo kwa li ya uka koshiponga eshi oya kondama popepi nOmatako. 

Omushingi woambulansa manga a uka koku ka tala oonakuningwa oshihakanwa okwa nyengwa okupangela oshihauto fiyo tashi wuko kopate ashike omushingi ina mona oshiponga. 

Ovanaudu vavali ova xulifa sha dja eshi oambulansa yopaumwene omo va li ya ya moshiponga. 

Oshiningwanima eshi osha ningilwa pokati kOtavi nOtjiwarongo, sha ningwa Etivali lwopo 00h40. 

Omupopiliko wopolifi moshitukulwa shaTjozondjupa Maureen Mbeha okwa koleka oshiningwanima eshi. Otaku hokololwa vati oambulanca ye lidenga meloli olo vati la teka nolali la kanghama mopate. Mbeha okwa holola ta ti eetuwa adishe oda li da taalela ondjila imwe, tadi di kOtjiwarongo da uka kOtavi. 

Ovalumenhu vavali va dja moambulansa ova xulifa poshiponga omanga vatatu va tuminwa koshipangelo kOvenduka monghalo ii omanga omushingi naumwe vali ve li monghalo i li xwepo. 

-wakudumoauleria@gmail.com