Oshipangelo shaShakati sha kuta eendokotola 40 

Oshipangelo shaShakati sha kuta eendokotola 40 

OSHAKATI – Oshipangelo shaShakati neudo osha kuta eendokotola 40 nelalakano lokukandula po omhumbwe yeendokotola odo kwa li inadi wana. 

Omukulunhuwiliki woshipangelo shaShakati Dr Ruben Kanime okwa koleka ta ti eendokotola dimwe oda tameka nale oilonga omanga dimwe otadi ka tameka omwedi tau ya. 

Kanime okwa weda po ta ti ovapangi 85 ova kutwa neudo yo koshipangelo shaShakati. 

Okwa ti momutengenekwafaneko woshimaliwa tau ka landulako natango otava ka kuta eendotokola. 

Okwa didilikwa oshipangelo kwa li hakukala ovanhu tava nyenyeta molwashi va lulilwa konghalo yokukala momikweyo efimbo lile. 

Ovanhu vamwe ohava di komikunda dokokule tava ka konga omayakulo ouhaku koshipangelo shaShakati shaashi osho shimwe shakula monooli. 

Ovanaudu koshipangelo itava kala vali momikweyo efimbo lile ile okushuna komaumbo inava pangwe molwashi paife koshipangelo oku na eendokotola novapangi va wana. 

“Eendokotola da kutwa oda wana okuyakula ovanaudu. Ovanaudu otava ka pangwa noupu noshoyo pefimbo shaashi ka pena vali omukundu,” ta ti. 

Kanime okwa ti epangelo otali twikile okuandjaneka omayakulo ouhaku molwashi osha fimana ngeenge oshiwana tashi pewa omayakulo ouhaku. 

Okwa ti keeshaala da yooloka di li moshipangelo okwa tulwa oilongifo opo ovanailonga va longe noupu. Kanime okwa ti epangelo otali twikile okukandula po yo omashongo amwepo oo a taalelwa koshipangelo. 

-fhamalwa@nepc.com.na