OKAKU KANANGULA – Nonando nena esiku lyahugunina lyokwiinyolitha uukalata womahogololo aantu moshitopolwa shaShana onkene taya ende shokadhi kowishi.
Omahala ogendji mpoka tapu inyolithwa uukalata womahogololo moshitopolwa shaShana ka gali gena aantu ohela omanga gamwe gena ashike aantu taya yalulwa.
Sho oshifokundaneki shika shayi moonkundathana naakwashigwana oshowo aanambelewa yoECN pomahala gayooloka, oya gandja omatompelo ga yooloka sha ikwa telela komaiyuuvo gawo.
Hendrina Paulus omunambelewa omukuluntu gwoECN kOkaku kaNangula okwa po pi kutya ohela aantu oya li taya e nde kashona noonkondo.
Ta ti, sho otundi onti-12h00 ya dhenge, ya nyola po ashike aantu yathika pu yatano, no pethimbo kwali ta po pi ngaaka ka pwali ena nando omuntu gumwe.
“Otwa ndhindhilike kutya aantu yamwe itaya inyolitha oshoka yamwe ka yena uutse woshilongo, ihe shoka hasho shina okukala uupyakandhi oshoka natango ota tu vulu okuya yambindhindha uuna yena oonzapo dhomavalo naakalelipo yaali,” ta fatulula ngaaka
Paulus okwa kumagidha kutya ina ku toka, mboka inaaya inyolitha natango naya longithe esiku lyonena.
Ta ti, ohaya tameke okuza 08h00 sigo 18h00.
Thomas Hikevali ngoka a li ta hogolola posenda yoku hokolola kOneshila mOshakati okwa ti, oyendji kayena ontseyo yesimano lyokwiinyolitha uukalata womahogololo.
“Otandi gandja ombendhi kokomisi yomahogololo oshoka inayi gandja omalongo tango koshigwana, ka tuna euveko lyithike pamwe,” ta nyenyeta ngaaka.
Hikevali okwa ti, okwandhindhilike kutya mboka yaana euveko kombinga yokwiinyolitha uukalata womahogololo oye wete ashike taya thimikwa okuhogololola ongundu tayi pangele.
Ta hokolola kutya, okwa thigi yamwe megumbo, teya lombwele kutya naya kiinyolithe uukalata womahogololo, ihe oya yamukula kutya, Swapo kena shoka e ya longela.
“Shoka otashi ulike kutya omuntu kuuviteko okwiishangitha,” ta po pi ngaaka.
Maria Shigwedha ngoka aadhika komutoolinkundana nguka pegumbo lye kEvululuko mOshakati okwa ti, ye ita hogolola oshoka kena ongundu ndyoka a hala okuhogolola.
“Oshihwe po ndi tale kutya otandi hupu ngiini ndi pe aanona yandje, okulya pehala ndi kale nda kalela omikweyo,” ta po pi ngaaka.
Sunday Shilimontulo gwomolukanda Okandjengedi okwa thindi omuthindo kutya omasiku gomahogololo naga gwedhelwe oshoka ha kehe gumwe a inyolitha.
“Oya ti natu inyolithe miitopolwa yetu, nenge mpoka ta tu ka hogololela ookansela yetu. Okwali twa tega okumona oshimaliwa komusilo gomwendhi opo tu mone oolefa okuya komahala hoka,” ta nyenyeta ngaaka.
Omukwatakanithi moshitopolwa shaShana mokomisi yoECN Amon Oiva Haimbangu okwa yelitha kutya omasiku gwokwiinyolitha itaga gwedhelwa.
“Otuna omukumo kutya ota tu ka gwanitha omwaalu ngoka twa tengeneka mehuulilo lyesiku lyonena,” ta po pi ngaaka.
Haimbangu okwa kumagidha wo oshigwana shi longithe ethimbo lya kala ko opo ya kuthe onkatu yomondjila ya inyolithe uukalata okukutha ombinga momahogololo taga ka kala ko momasiku 27 Novomba nuumvo.
– vkaapanda@nepc.com.na