Omauliko giipindi ngoka haga kala ko omumvo kehe mOngwediva, nuumvo oga tengenekwa taga ka kala ko momasiku 26 gaAguste sigo 01 Sepetemba.
Omawuliko giipindi omumvo gwa yi okwa li ga ningwa okupitila komalungula omanga momumvo 2020 kwa li ga kalekwa, omolwo omukithi gwoCovid-19.
Omupopiliko melelo lyondoolopa lyaNgwediva Jackson Muma okwa ti, nonando oCovid-19 natango omo yi li mokati ketu, omauliko giipindi otaga ka ningwa mesimaneko lyoompango nomalandulathano gokukeelela omukithi ngoka.
“Elalakano lyetu, okugalula eliko lyoshimaliwa, ndyoka lya gu pevi oshowo okugalula oongeshefa ndhoka dha li dha pata,” Muma ta ti ngaaka.
Ta ti, omawuliko giipindi gomOngwediva, ompito ombwaanawa kaanangeshefa oshowo komahangano ga yooloka, oku ulika uunongo niilonga oshowo okushingitha iilandandithomwa yawo.
Omawuliko giipindi mOngwediva okwa li ga patuluka lwotango momumvo 2000, nonuumvo oge li kohi yoshipalanyolo “Okugalula mbala eliko”.
“Iipindi mbyoka ohayi gongaleke aanangeshefa oshowo aantu yaza ko kule, taya ulikilathana uunongo niilonga yawo, mehala limwe,” ta popi ngaaka. Muma okwa ti, nuumvo oya tengeneka okukala yena aawuliki yiipindi ye vule 300, okuza koombinga noombinga oshowo taya zi kondje yiilongo. Ta ti, elalakano okugandja ompito kaanangeshefa oshowo ko mahangano guulike iishingithomwa yawo oshowo okugalula eliko mondoolopa yaNgwediva oshowo moshilongo ashihe. “Momasiku ge li 30 gaJuli nuumvo, elelo lyondoolopa ota li kaninga ohungi yokugongela oshimaliwa okulongekidha omaindilo giipindi,” ta ti ngaaka. Omawuliko giipindi otaga ka ulika iilandithomwa ayihe okuza kiikulya, kiizalomwa na kehe shoka hashi vulu oku etwa po noonyala oshowo oku eta oombelewa hadhi gandja omayakulo ga pumba po pepi.
Muma okwa ti, omawuliko giipindi go numvo otaga ka kala ga yooloka komakwawo, oshoka otaga ka gandja wo ompito natango no kaanangeshefa mboka itaya vulu okuthika.
“Ota tu ka ulikila mboka itaaya vulu okuthika, okupitila ko mathano gokomalungula gwopashinanena ,” ta popi ngaaka.
Ta ti, shoka otashi ka kwathela okuulikila mboka itaaya vulu okuthika, no yena ehalo lyoku tala oshowo okuulika iilandithomwa yawo.
Omaindilo oge li nale metifa, na kehe gumwe ena ehalo okwa tegelelwa a kale a ninga omaindilo omanga omasiku 30 ga Mei inaaga thika.
Oofoloma dhomayindilo otadhi monikawww.oatf.com.na or by inquiring at info@oatf.com.na / ongwetradefair@iway.na
– vkaapanda@nepc.com.na