Charles Ndeumane
OUTAPI – Omumati ngoka a li a lopotwa koshifokundaneki shika iiwike iyali ya piti kutya okwa tidhwa mosikola molwaashoka anuwa kena onzapo yevalo okwa ti uuyelele mboka ka wu li mondjila, ina tidhwa shili mosikola, ashike okwi ikuthamo yemwene.
Markus Ndeshitila omukalimo gwomondoolopa yUutapi moshitopolwa shaMusati ngoka kwa li a lombwele Kundana iiwike iyali ya piti kutya okwa tidhwa mosikola yaDavid Sheehama omumvo gwa zi ko molwaashoka ke na uuthemba mboka wa li tawu pulwa opo i inyolithe a shange omakonakono gongondo 11 okwa galukile oshifokundaneki shika nuuyelele kutya ndhoka a popile nale ka dhi shi dhoshili.
“Ngame ina ndi tidhwa shili mosikola, ondi i kutha mo ngame mwene sho nda loloka oku kala ta ndi pulwa uuthemba oshoka onda kambadhala oku wu konga ihe onda hulile muunyengwi. Ondi ipula kutya oku kala mosikola ngame ndaa na uuthemba woshilongo ota ndi mana po ashike ethimbo lyandje oshoka kandi wete ta ndi ka mona iilonga ndaana uuthemba,” osho Ndeshitila a ti.
Uuyelele mboka owa holoka konima sho omukuluntusikola gwosikola yaDavid Sheehama Fredrick Nghifinwa a kwatathana nahekulu yaNdeshitila konima sho Nghifinwa a li a pulwa kombinga yoshiningwanima shoka koshifokundaneki shika iiwike iyali ya piti.
Hekulu yaNdeshitila Abisai Heita okwa ti okwa dhengwa iihwa komeho komutekulu sho e mu lombwele kutya okwa tidhwa mosikola nani hasho. “Kandi shiwo kutya omolwashike ena oku fundja sigo tashi kiifokundaneki. Onda li ndi itayela shoka a lombwelendje kutya okwa tidhwa mosikola oshoka ondi shishi kutya kena uuthemba woshilongo, nani omumati ota fundju ashike,” osho Heita a popi ngaaka.