Ester Unoovene, omuhongifikola keifano oye umwe womovahongwanhu vanhini ovo va tokola okuninga ovanafaalama eshi va dimbulula kutya kave wete oilonga.
Unoovene (33), okwa mana elihongo laye mo2015. Momudo omo a djala enguwo, omukainhu ou okwa mona po ilonga yopakafimbo yokuhonga ofikola fiyo omo2017, nokudja opo ina mona tuu vali oilonga.
“Eshi nda ka mona kutya itashi pi vali, onde likwatela ko ame mwene ndi ye mounafaalama. Ounafaalama onde u tameka odula ya dja ko, konima eshi nda taula epya letu pokati, ombinga imwe oyokulima yoo ombinga imwe oyoshikunino shetu nomushamane wange,” Unoovene ta ti.
Okwa twikila kutya moshikunino shaye oha kunu mo oingumutulu ihapu ngaashi onduba yeenyanga, omatama, omanuwa oshoyo ombidi.
Okwa popya kutya ombinga yepya ei a kufa oyakula, noha mono mo lela shihapu shokulandifa.
Okwa ti ovanhu vahapu pomudingonoko ohave ya ashike kuye, tave ya okulanda oingumutulu yavo kuye. Vati ovanangeshefa vahapu vomangeshefolo opedu vomOkongo, Oshakati nOngwediva navo oko have ya okuteka eestoka deenyanga nomatama kuye.
Unoovene okwa popya kutya oku na ounona vavali nohe va yambidida okudja moshikunino shaye nakeshe eshi va pumbwa opamwe novapambele vaye.
“Ongeshefa yange ohai vatele nge yoo komalipulo ahapu a puka, ngaashi kwa li haa hange nge nale eshi handi kala ashike ndi li omutumba meumbo ndihe na nande opapa handi nyangadala,” ta tumbula.
Okwa twikila kutya yee ke li ashike mongeshefa yukulandifa oingumutulu, natango oha landifa yoo eexuxwa, omai oshoyo eenghuti.
Nonande Unoovene e na ongeshefa lela tai ende nawa, natango vati oku na ngoo omashongo aa taalela ngaashi ounongo wofaafa mounamapya, omiti dokutula poimeno hadi kala vati di na ondilo, oshoyo omhumbwe yomeva.
“Ohandi kumaida ovanyasha vakwetu ve li momaumbo vehe na oilonga va kufe nande ombinga mounamapya, opo ashike tava dulu okukwafa nasha. Eshi kasha shi kutya eifano ile oshike, okudenga ashike oluhepo, oshoyo okulonga noudiinini,” Unoovene ta ti.