Festus Hamalwa
Omundokotola woimuna moshitukulwa shaHangwena Dr Magaano Kephas okwa kumaida ovanafaalama aveshe opo va kale tava lopotele oshipangelo shoimuna osho shi li mEenhana kombinga yomikifi tava didilike moimuna yavo.
Okwa ti osha fimana opo omikifi di kale da lopotwa pefimbo opo oimuna i kale ya pangwa diva noshoyo kukelelwe etandavelo lomikifi moimuna ikwao, unene tuu omikifi odo hadi dulu okutandavelo meendelelo.
Meenghundafana a ninga naKundana Etitano Kephas okwa hokolola ta ti ouministeli wounamapya, omeva nomatululo omadu owa tameka oshikongo shokuyandja ouyelele nomadeulo kombinga yovanafaalama vokonooli nghee ve na okukala tava kaleke po oimuna yavo ina okukolele noshoyo kukala tava kufa ombinga monangeshefelo opashiwana oipindi yoimuna.
Okwa ti omadeulo taa yandjwa okwa kwatela mo ehongo lomikifi da yooloka hadi kwata oimuna ngaashi eengobe, omiti doimuna ngeenge tai vele nefimamo loupapa keengobe.
“Otwa tameka nale nokuyandja omadeulo kovanafaalama moikandjohoololo imwe yomOhangwena. Oshiwana okwa li sha holoka momwaalu muhapu noshi na ohokwe yokukala sha pewa ouyelele wa fimana shaashi okwa li tashi pula omapulo e li kwatelela komikifi doimuna,” Kephas ta ti.
Okwa yelifa ta ti omadeulo otaa yandjwa oshali moikandjahoololo aishe onghee oshiwana nashi kale tashi holoka momwaalu muhapu opo shi dule okukala sha pewa ouyelele ou wa fimana.
Kephas okwa ti ei oyo omhito iwa kovanafaalama opo va dule okukala va kufa ombinga momadeulo aa shaashi otashi va kwafele okuhambula po oimuna yavo tashi pitile mokukala ve na oufita uhapu woimuna.
Okwa weda po ta ti ombelewa yaye oya didilika ovanhu hava ka landela oimuna yavo omiti keehaputeka ina va pula tete oshipangelo yavo shoimuna.
“Osha nyika oshiponga ngeenge omunhu ta yandje omiti keengobe daye ehe shi kutya omiti ohadi longifwa ngei pi shaashi eshi otashi dulu kudipaa oshimuna,” ta ti.
Kephas okwa ti ouministeli wounamapya otau lalakanene okukala waxwaxwameka ovanafaalama va kale ve na eudeko nowino kombinga younafaalama woimuna onghee oshipangelo shoimuna shomEnhana oshe li longekida efimbo keshe okukala sha yandje omayakulo kovanafaalama aveshe.