Aakalimo yomiitopolwa yomonooli mboka ya simaneka omafuma onga oshipalutha pethimbo lyomvula oya ti omuloka omwaanawa ogwa kandula po omukaga.
Taya ti, ethimbo lyokukwata omafuma ihali monika lwaali onkene ohaya tegelele aluhe omvula yi loke nawa sigo omafuma ga zi mo, yo taya ka kwata omafuma.
Shikoyeni Negonga, gomomukunda Ompundja okwa ti omasiku ngaka omukaga kegu shi.
“Omasiku ngaka itandi ipyakidhile naashoka ndi na kulya uulalelo nenge shomwiha, omafuma oga kandula po uupyakadhi,” ta ti ngaaka.
Ta ti, omafuma ohaga kwata okupendukila omvula ya loka nawa, oshoka olyo ethimbo haga fumbuka mo mevi.
“Oyendji ihaya toka omafuma. Uutoye wefuma ondi wu shi, otau ku thigitha po iilonga,” ta popi ye ta yolo.
Shekutamba Shilongo ngoka a li ta landitha omafuma kooha dhopate esiku ndyoka okwa ti, omafuma agehe a landitha oge mu pe oshimaliwa shi thike N$800, momasiku ashike gaali.
“Ohandi landitha omafuma ge li gatano koN$35, ihe ihaga kala po. Kehe ohauto oyi na okukankama uuna ya mono nda yelutha omafuma mombanda,” ta popi ngaaka.
Ta ti, aashona yomuyo ihaaya li omafuma, ihe kashi shi kutya oge na uupyakadhi, ihe oshoka inaya mona uutoye wago. “Efuma ito li li lumwe, ihe to li tondo, shapo ongele inaali telekeka,” ta popi ngaaka.
Shilongo okwa gwedha po ta ti, omasiku tage keya otaya ka kwata oohi, nonando sigo opaife inadhi ya.
“Oohi ohadhi ya uuna omeya ga ningi ogendji. Ashike oshongo shandje kasha li kokule,’ ta imemeha.
Omukulupe gumwe momukunda Omeege okwa ti efuma oshikulya oshitoye, uutoye wondjuhwa natango itau adha mo mefuma.
“Omafuma ga pendje ndi ge ku telekele, opo wu tseye uutoye wefuma,” ta popi ngaaka. Ta ti, efuma olyi na okutelekekwa, oshoka ngele inali pya nawa, otali ku etele uupyakadhi.
Omukulupe ta ti, omafuma ohaga vutulwa tango omandjandja, ee ta ga opalekwa nawa taga tulwa mombiga.
“Ohaga tulwa ashike omeya, omongwa nomagadhi petameko. Ta ti kehe gumwe ohe ga teleke momukalo ngoka e shi, shampa ashike taga telekwa ga pya nawa,” ta fatulula ngaaka.
vkaapanda@nepc.com.na