Opolifi moshitukulwa shaHangwena otai konakona oshibofa shomukainhu weedula 47 vati a monifwa oshiponga nekuva kukahewa kaye.

Oshiningwanima osha ningwa konima yoivike ivali komukunda Ohakafiya moshikandjohoololo shaEenhana.

Omupopiliko wopolifi moshitukulwa shaHangwena Warrant Andreas Nghiyolwa okwa hokolola ta ti ovakainhu ava ohava di pomukunda umwe, omo alushe hava kala ve li pamwe keendingosho.

Ota ku hokololwa kutya nakuninga oshihakanwa okwa dimbwa ombidja yaye keumbo lakahewa waye.

Opolifi oya hokolola tai ti efiku la landulako nakudengwa okwa ya keumbo lomufekelwa opo aka taleko ombidja yaye.

Omufekelwa vati okwa kufa ekuva ndele ta denge kahewa kaye komutwe nokonima okwa ku fako omupini noku mu denga kofingo.

Nakuninga oshihakanwa okwa twalwa koshipangelo ashike okwa li ta holoke ouyelele kutya okwa dengwa kukahewa kaye.

Opolifi oya ti ouyelele owe uya kombada konima eshi ovapangi va ningila nakudengwa omapulapulo.

Opolifi oya ti omufekelwa oku na okukwatwa po molwashi okwa longela kahewa kaye omunyonena womahepeko omomaumbo.

Okwa teelelwa omufekelwa opo a kale a holoka momhangu nokupangulilwa oshibofa shonghendabala yedipawo.

Nakuninga oshihakanwa okwa li a tambulilwa koshipangelo shaEenhana noku li paife keumbo.

Opolifi oya kumaida oshiwana opo shi xulife po okuholeka ouyelele ngeenge tashi ningilwa omahepeko omomaumbo.

fhmalwa@nepc.com.na