GOBABIS – Omukainhu weedula 50, okwa xulifa mEtivali loshivike eshi, eshi a topelwa koshitenda osho kwa li ta xwike ye e ke shi landife po. 

Josephine Setsisho wokolukanda Canaan mGobabis, okwa dengwa koshitenda osho sha nhuka monduba yoitenda oyo ya li momundilo oo va li tava xwike nelalakano opo ve ke i landife po konhele haku landwa oitende i ka longululwe. 

Opamwe nomusameane waye Gabriel Enstant, oo naye iha longo, ovaneumbo ava ohava toola nokuwapaleka oitenda, tava xwike ko oinima oyo inai pumbiwa ngaashi oikwanailona, opo nee tave ke i landifa. 

Ongula yefiku olo, Enstant okwa meneka a ya ketoto, ta toola ko oitenda oyo a ya nayo keumbo, tava tameke nee oku i wapaleka. 

Mupya munene, shimwe shomoitenda oyo va toolwa, taku fekelwa kutya omhunda yomhepo yomotuwa osha fula nokutopa.

Kusho okwa dja oshitenda nokudenga omukainhu oo a li popepi nediko lomundilo, ndele tashi mu dipaa poshikando. 

Okwa li yoo nokaana kavo komido nhatu oko nako ka monifwa oshiponga shinene keisho. Okamonamati aka oka twalwa koshipangelo koGobabis ashike okwa pita mo divadiva nokutwala meendelelo koshipangelo koWindhoek opo a ka mone ouhaku wopombada. 

Deputy Commissioner, Chrispin Kalimbula okwa koleka oshiningwanima eshi. 

Okwa longifa yoo omhito oyo okukunghilila oshiwana shi yande okutoola oinima shihe i shii, naunene oku i xwika. Ta ti opolifi otai ke ya po nomaxwaxwameko moshitukulwa ashishe okulonga ovanhu nokuyandja ouyelele u na sha nokuliamena nokukala kokule noinyangadalwa oyo tai tula eemwenyo moshiponga. Ovakwapata vanakufwa ou ova shivifilwa, nomakonakono opolifi moshinima omu otaa twikile. 

-Julia Kamarenga omunambelewa wokupitifa ouyelele mouministeli womauyelele nomakwatatafano opaungoba moshitukulwa shaMaheke.