Omakonakono otete kombinga yoshikumungu shomukulunhufikola ha longelo kofikola i li moshitukulwa shaHangwena ou ta tamanekwa kutya vati okwa kwata omonakadona onghonga okwa pwa okuningwa. 

Minista wehongo, omaungomba nomaudano Sanet Steenkamp okwa koleka ta ti osho shi li omukunhufikola okwa ningilwa omakonakono otete. 

“Paife okwa teelela okupewa enyamukulo la xuninwa kombinga yoshikumungu eshi,” ta ti. 

Okwa ti omulumenhu ou weedula 44 okwa li ta ningilwa omakonakono shaashi ta kufekelwa kutya okwa li e li mekwatafano lopaihole nomonakadona waye weedula 15.

Omukulunhuwiliki wehongo moshitukulwa shaHangwena Isak Hamatwi okwa koleka ta ti omutamenekwa ou okwa pewa omukanda oshivike sha dja ko wa shangwa oidjemo kombinga ya sho sha monika po konima yomakonakono. 

“Okwa pewa omafiku 14 opo a kale a nyamukula kombinga ya sho sha shangwa momukanda oo,” ta ti. 

Okwa weda po ta ti ngeenge okwa nya mukula ota ku ka ningwa omatokola taa ka dja kombelewa yomukunhuwiliki mounisteli wehongo. 

Opolifi oya hokolola tai ti omukulunhufikola ou okwa li a kwatwa po omudo wa dja ko keumbo laye kOshakati. 

Okwa pewa omhito yoku li futila mo modolongo noshimaliwa sheeN$2000, konima eshi kwa li a holoka momhangu yaShakati omudo wa dja ko. 

Omut amanekwa okwa lombwelwa komhangu opo aha kale mekwatafano nokaana kaye. 

Omunafikola ou paife okwa tembulwa ko kofikola nokeumbo laxe okwa tembulwa ko. 

Opolifi oya hokolola tai ti nakuninga oshihakanwa okwa li e li mondodo onhi-9 pofikola opo ha pa longo xe. 

Oshiningwanima osha ningwa omudo 2023 noshoyo 2024 keumbo lavo kOshakati. 

Ota ku hokololwa kutya okaana oka kala nokukwatwa onghonga lwoikando ya yooloka. 

Opolifi oya hokolola tai ti omutamanekwa okwa ufana omona monduda yaye yokunangala opo vati eke mu fule keemadi. 

Okudja opo omukulunhufikola ou okwa lombwela okaana kutya ota ka monika nawa nokuweda po ta ti vati omonakadona okwa kula paife nokuya moixulo. 

Opolifi oya ti omulumenhu ou okwa dima ko kolusheno ndele tai moixulo nokaana kaye ashike vati ina longifa ongumi. 

Okwa lombwela okaana kaye kutya ina ke shipopya komunhu shaashi ota kala aye modolongo ndele omona ta kala ehe na xe wokumuyambidida.