OSHAKATI- Omukulunhufikola ha longelo kofikola i li moshitukulwa shaHangwena oo vati a kwata omonakadona onghonga, okwa pewa omhito yoku li futila modolongo. 

Eshi a holoka momhangu yaMangestalata mOshakati Etitatu loshivike sha djako, omulumenhu ou okwa pewa opo e li futile mo modolongo noN$2000.

Oshibofa shaye osha udulilwa komafiku aheyali omwedi ou.

Omulumenhu oy ota tamanekelwa ekwatonghonga lokaana kaye kokakado keedula 15. Okaana oko vati oko ke li yo omunafikola pofikola opo hapa longo xe, ke li mondodo onhi-9.

Omukulunhu koshikondo shokunakona oimbuluma moshitukulwa shaShana omupedu Commissioner Fredick Ndjadila okwa koleka ta ti omukulunhufiko okwa dja mo modolongo paife.

Ndjadila okwa ti omulumenhu ou okwa pewa omilandu komhangu opo a kale kokule nokaana kaye oko vati a kwata onghonga.

“Ina pitikwa okukala mekwatafano nomonakadona,” Ndjadila ta ti.

Omunafikola ou paife oha kadi keumbo laina, mumwaina waina nokwa tembulwa ko kofikola yaxe.

Ndjadila okwa hokolola ta ti omulumenhu ou vati okwa kwata omonakadona onghonga lwoikando ya yooloka okudja omudo 2023 fiyo oneudo.

Ota ku kutya omutamanekwa ou a li ha kala oye aeke nokaana meumbo, kwali ha ufana okaana kaye monduda yaye kekemufule keemadi keumbo lavo li li mOshakati. Okudula oko vati oko nee haku xulile momusamane oo ta pilukile po okamona. Ye vati okwa kala he ka lombwele kutya inake shi popya shaashi ota kala a ye mondolongo ndele taka mono oixuna.  

Omukulunhuwiliki mounisteli wehongo Sanet Steenkamp okwa ti omukulunhufikola ou ota ningilwa omakonakono kombinga shikumungu eshi.

“Otwa tameka okuninga omakonakono omoule,” ta ti.

Steenkamp okwa ti omukulunhufikola okwa manguka okutwikila noilonga yaye omanga omakonakono taa ningwa.

Omukulunhuwiliki wehongo moshitukulwa shaHangwena Isak Hamatwi okwa ti omukulunhufikola ou ina tameka oilonga natango.

“Okwa tula mo omafiku okafudo manga,” Hamatwi ta ti.

fhamalwa@nepc.com.na