Omulumenhu a xulifila moshiponga shondalu

Omulumenhu a xulifila moshiponga shondalu

Omulumenhu weedula 52 okwa xulifa eshi a pila mobashu yaye kolukanda Omdel modoolopa yaHenties Bay.

Nakufya kwa tongololwa oye Hendrick Gawise omukalimo womoHenties Bay.

Omupopiliko wopolifi moshitukulwa Erongo, Chief Inspector Ileni Shapumba okwa hokolola ta ti obashu yaGawiseb oya monika kovashiinda shaye ya yaka omundilo.

Okwa ti ovashiinda shaye noshoyo ovanailonga va muni ova kendabala okudima omundilo ashike omumenhu ou okwa hangika nale a xulifa.

Shapumba okwa ti fiyo opapa ka pena ouyelele kombinga yoshi etifi shomundilo.

Olutu laye ota li ka ningilwa omakonakono opo ku ta li ke kutya okwa fya koshike.

Oshiningwanima oshikwao, ovalumenhu vavali xupa moshiponga shomundilo ashike umwe okwa monifwa shiponga konima eshi obashu yavo ya pya po aishe.

Oshiningwanima osha ningwa modoolopa yaSwakopmund efimbo loufiku.

Ota ku hokololwa kutya ovalumenhu ava ova dja keendingosho va kolwa.

Opolifi oya ti ovalumenhu ova tema okalexita ndele tava dimbwa oku ka dima.

Ota ku hokololwa kutya xe yovalumenhu ava okwa mona eebashu mbali da haka omundilo.

Oonakuninga oihakanwa okwa li va nangala meebashu da yooloka.

Ovalumenhu ova pendulwa kuxe nokudja mo meebashu.

Eebashu adishe mbali oda pya po mwa kwatelwa omaliko ayeshe.

Opolifi oya hokolola tai ti tete omundilo owa tameka kobashu omo kwa li mwa nangala omulumenhu umwe ndele tau tandavele fiyo okobashu ikwao.

Natango modoolopa yaSwakopmund kolukanda DRC okwa lopotwa omulumenhu a xupa moshiponga shomundilo konima eshi obashu yaye ya pya po.

Ota ku hokololwa kutya omulumenhu okwa li tateleke ashike okwa dimbwa okudima ekende lohaasha osho sha eta ekende litope.

-fhamalwa@nepc.com.na