Sergeant Dimbulukeveni Namhila (43) ngoka ta fekelelwa edhipago lyomuhingi gwololi Shilongo Eliud Hamukwaya (38) okwa tindilwa eifutilemo mondjeendhililo.
Namhila okwa holoka komeho gomupanguli Vennecky Mumbala mompangulilo yaMangestalata mOndangwa Etiyali. Okwa tindilwa eifutilemo omolwuunene woshipotha she mu taalela.
Omweeti gwiihokolola gwepangelo Elina Hashipala okwa gwandja omatompelo opo Namhila kaa pewe ombooloha, ta ti, shotango ota tamenekelwa edhipago, ye ota vulu okwiidhopa momakonaakono goshipotha.
Omupanguli Mumbala oku undulile oshipotha shoka komasiku gatatu gaJuni nuumvo. Okwa ti Namhila ota vulu okuninga eindilo pambelewa opo a pewe ompito yeindilo lyokwiifutila mo.
Omakonakono gopolisi oge li metifa.
Otaku hokololwa kutya Namhila okwa yaha omuhingi gololi Hamukwaya nondjembo nokusa ethimbo olyo tuu ndyoka uusiku wOsoondaha.
Oshiningwanima shoka anuwa osha ningilwa peinda lyopolisi lyomondjila kOnhuno moshitopolwoa shaHangwena.
Nakusa anuwa okwa li ta piti pomboloka mpoka ta zi koAngola a li ngeno ta fala ooshako dhomahangu kOpoto moshitopolwa shaShana.
Otaku hokololwa kutya omuhingi anuwa okwa li a kankamekwa kaanambelwa, a gandje ombapila yokuya koshiviha ndjoka anuwa a ndopa okugandja.
Oondjuma anuwa odha li dha tameke pokati kaNamhila naHamukwaya.
Sho anuwa Hamukwaya a londo mololi ngeno a hinge a ye, Namhila anuwa okwa li a yaha megulu lyololi e ta tsikile okuyaha Hamukwaya kolutu.