Victoria kaapanda
Katopi kaNamibia okwa ti, nonando iilongitho yoshinanena ya ihanena moshilongo shetu, ye ita dhimbwa okulongitha oshiketala she okuhika oongalo.
Onkulungu yokuhika oshiketala Katopi, okwa yambukile momukunda Onanime moshtopolwa shOutapi.
“Oyendji otaya longitha iimaliwa oyindji, okulanda omandjukundjuku ngoka haga lili oongalo, ihe ngame Katopi kaNamibia otandi kongo omboloto yandje noshiketala shandje,” ta popi ngaaka.
Omuhikingalo gwoshiketala okwa ti, oha hiki oongalo dhomuthigululwakalo oshowo oongalo ndhopambepo, ihe natango oha vulu okuhika oongalo dhimwe dha gwedhwa po.
Katopi ngoka a li a fuula aapulakeni moshitopolwa shOutapi oshiwike sha zi ko noongalo dhe tadhi kwelengendja nawa okwa ti, oha pula ashike N$10 mongalo yimwe.
Nongele ota pulwa a inyenge mo mongalo, opo aatali ya mone nkene ta danisa nokuulika uunyakwa we, oha pula N$20.
“Onda tameke okuhika oongalo dhandje mo2015, ihe sigo onena otandi pula komeho,” ta ti ngaaka. Ta ti, okuhika oongalo noshiketala ohashi fuula oyendji, ta ti, ihatokwa nando mokati koshigwana oshoka aantu ohaya kala ya nyanyukwa uuna ya tala yo ya pulakena oongalo dhe.
Katopi oku na usiidii mboka ha kala a hinda peke, a landitha omanga omadhina goongalo ga kankekwa koshiketela.
Ta ti, kehe ngoka ta pula ongalo ndjoka a hala oko ta lesha hoka. Konima a li a pulwa kuKundana kutya oha longo oshimaliwa shi thike peni mesiku, okwa ti shoka osha ikolelela kutya okwa longo
ngiini, ihe ita vulu okupopya omwaalu goyene lela.
“Uuna nda futwa oshimaliwa, ohandi yi tula mokatungwa kandje, moka handi ke yi kutha mo ashike uuna nda yi kegumbo, oshoka iimaliwa yongeshefa,” ta popi ngaaka.
Ta gwedhwa po ta ti, nonando onkalo ndjoka e li muyo hayo naanaa a hala, omolwa uunyengwi woshimaliwa okumuhumitha komeho, ota pandula omolwomboloto ndjoka ha mono
mo.
“Otandi indile moshigwana ngele ope na ngoka ta vulu okuyambindhindhandje ndi Hume komeho, a dhengela ndje konomola yandje yopeke 081 6066 572,” ta popi ngaaka.
“Natu kaleke po omuthigulwakalo gwetu,” ta kumagidha ngaaka.
– vkaapanda@nepc.com.na