Elelo lodoolopa yaMuthiya ola ongela oshimaliwa mouvalelo wowina wa ningwa Etitano nelalakano lokukonga oshimaliwa shokueta omayakulo nexumokomesho modoolopa.
Oshimaliwa sha ongelwa otashi ka longifwa okuyambula po odoolopa ngaashi okutunga endiki loshiwana shovayelele opo va dule okukala ve na onhele yavo yokukala tava longo oihongomwa yavo yomufyuululwakalo, okutungila yoo ovanafikola omuhandjo nosho tuu omayakulo amwepo a pumbiwa modoolopa. Edi oda popiwa kumayola wodoolopa yaMuthiya Johaness Ndeutepo meenghundafana va ninga naKundana Etivali eshi a hokolola ta ti ombelewa yaye otai lalakanene okuyambula po odoolopa nokukwashipaleka kutya oshiwana oshi na omayakulo ngaashi naanaa eedoolopa dikwao di lili. Okwa ti ouvalelo ou okwa li wa longekindwa kelelo lodoolopa, oku kwa li ku na ovaleli va yooloka mwa kwatelwa omuprima minista woshilongo. Ndeutepo okwa ti elelo lodoopa otali ka tunga endiki lokukala hali di ounona aveshe ve li momapandaanda shaashi okwa didilikwa odoloopa yaMuthiya i na ounona vahapu vehe na apa hava di eshi hava nangala ashike koshi yomiti, omanga vamwe ova dika omatwali okunangala. “Otwe lipyakidila nokukala hatu ongele oshimaliwa fiyo omodula tai ya opo tu kale twa mona oshimaliwa sha wana okulonga oinima aishe twa tula moilonga neudo,” Ndeutepo ta ti. Okwa ti ota indile ovanangeshefa, ovaleli vopapolitika, omahangano opaumwene opo ve uye va yambidide opologalama ei ya totwa nelalakano lokuongela oshimaliwa shokuyambidida ovanhu ve li momhumbwe nokuyambula po odoolopa.
Okwa ti kukeshe ou e na ehalo lokuyambidida na kwatafane nombelewa yaye ile nombelewa yomukulunhuwiliki melelo lodoolopa.
Okwa weda po ta ti odoolopa yaMuthiya natango onghee ngoo ya taalela eshongo lomeva taa ende kashona, onghee okwa kunghulila ovakalimo vodoolopa opo va kale va ngungumana omanga omukundu tau kandulwa po. Okwa ti ovanhu nava twikile okufuta oifuta yomayakulo amuni opo oshimaliwa shi longifw oku eta po omayakulo a wedwa po modoolopa.
“Natu kalekeni po odoolopa yetu ya yela efimbo keshe shaashi oukoshoki owa fimana,” Ndeutepo ta ti. – fhamalwa@nepc.com.na