Auleria Wakudumo
Elelo lodoolopa yaNdangwa ola unganeka pambelewa oshikonga shokuwapaleka odoolopa.
Omupopiliko wodoolopa Petrina Shitalangaho-Mutikisha okwa holola kutya ova didilika kutya ovakalimo vomOndangwa ihava longifa omandoloma oimbodi oo a tulwa modoolopa kelelo.
Oimbodi oyo tai ekelwa modoolopa inai kakeka ashike odoolopa nokutula ouhaku wovakwashiwana moshiponga ndele otayi monikifa yo efano lodoolopa lii nokushunifa pedu omwaalu wovatalelipo.
Elelo lodoolopa ola holola kutya otali ka tala ko omunyano wodoolopa pakuekela oimbodi keshe pamwe onga oshinima sha fimana.
Oshikonga shokuwapaleka otashi ka ndungika oshiwana kombinga yowii wokuekela oimbodi modoolopa. Oshikonga otashi ka twa yo ovanhu omukumo opo va wapaleke omidingonoko davo nokukala pomalukalwa a yela.
Oshiwana, ovanangeshefa nakeshe umwe ota indilwa a longife omadoloma oo a tulwa modoolopa kelelo.
Oshiwana otashi indilwa yo opo shi xulife po okuekela oimbodi peenhele da mbwalangadja, momilamba, momapandaanda nopeenhele odo inandi ufwa okuekela oimbodi.
Shitalangaho-Mutikisha okwa holola kutya elelo otali ka katuka onghatu yopombada okuyandja ehandukilo kukeshe oo ta ka hangwa ta ekele oimbodi modoolopa.
Ohatu indile ovakalimo aveshe opo va tule oukuni kumwe nokuwapaleka odoolopa.