Auleria Wakudumo

Omushikingalo James Shimooshili (29) nedina la shivika nawa Richman Namdance okwa holola kutya ota ka pitifa oalbum ya ye yotete hai ifanwa “Situation” muJuni neudo. 

Richman okwa ti okwa yandja edina “situation” koalbum ya ye shaashi otai holola onghalo yonghalamwenyo ya ye omo eli paife. 

Richman okwa ti oshitalendi shaye ina shi diilila ko. 

“Onda kufa etokolo kutya nandi tameke okwiimba mo2023, onda tameka ashike ngomashendjo handi ti pamwe handi shi endifa ngaho,” Richman ta holola ngaho. 

Okudja opo, Richman okwa ti ovanhu vahapu ova ka kala ve hole eengalo daye noluhapu ova kala tava pula kutya ova hala okulanda oalbum ya ye. 

Richman okwa holola yo kutya mokwiimba oha mono mo okafilinga oko hake mu kwafa meemhumbwe daye. 

Okwa ti oshimaliwa eshi okweshi ninga unene ngeenge ha ifanwa poivilo yonhumba ile oyoongalele opo a imbe. 

Okwa ti okwa imba keenhele domaulikilo oipindi ngaashi Omuthiya, Eenhana, Helao Nafidi, peenhele domalihafifo ngaashi peendingosho nopeenhele dikwao.

Richman okwa shiivika kuvahapu molwongalo ya ye oyo ya li ya andjakana noshilongo “I need a woman” osho sha hala kutya okwa hala omukwafi. 

Okwa ti ongalo ei okwei shika konima a fiwa po kukahewa kaye kopaihole osho shali shemu fiya a teka omutima nai. 

Okwa weda po ta ti okwa shiivika vali nongalo ikwao oyo a shika naDama Monique hai ifanwa onghalamwenyo inoi kondjifa, shapo omashongo to keelele. 

“I want a woman”, onghalamwenyo oya ningifa nge ndi kale ndi shivike kuvahapu molwounongo wange wokwiimba,” Richman ta holola ngaho. 

Nonande teshi endifa nawa meengalo, okwa holola kutya omashongo ohaa kala apeshe. Mo2022, Richman ina pondola okupitifa oalbum shaashi kapa li oshimaliwa. “Molwaashi kandali ndina apa handi longo, osha ka kala shidjuu okupitifa oalbum yange,” ta holola ngaho. 

Richman okuna etimaumbwile kutya otaka mona mo okafilinga kakola mokulandifa oalbum yaye. 

-awakudumo@nepc.com.na