Eekansela 11 vomoikandjohoololo ya yooloka mOshikoto ove liunganeka opo va kale tave liyambe okuyandja oshimaliwa N$1 000 komwedi keshe shokuyambidida eengeleka.
Oshimaliwa osho otashi kala tashi yandjwa okudilila kukansela keshe fiyo omudo tau ya.
Edi oda popiwa kukansela woshikandjohoololo shaGuinas Elias Marthinu pefimbo a ninga eenghundafana naKundana eshi a holola ta ti ova didilika eengeleka dihapu nado di na oyuuyemo ya shuna pedu.
Onghee naashi osha eta opo va eta po eladiladilo lokukala tava yandje oshimaliwa komwedi keshe opo shi kale tashi yandjwa keengeleka di li moikandjohoololo ya yooloka.
Okwa ti otava lalakanene opo va kwatele po ekwatafano liwa nelongelokumwe neengeleka.
Marthinu okwa yelifa ta ti konima ngeenge oshimaliwa osha ongelwa otashi ka pewa kansela mwene woshikandjohoololo opo a ninge etokolo kutya ote shi yandje kongeleka ilipi po.
“Otashi di kukansela yemwene kutya oshimaliwa ashishe ote shi yandje kongeleka imwe ile ote shi topolele eengeleka da yooloka di li moshikandjohoololo shaye. Onghee konima ngeenge ongeleka oya pewa oshimaliwa, oyo vene tai tokola kutya otai longifa ngeipi oshimaliwa shayo,” kansela ta ti.
Okwa ti oshikandjohoololo keshe otashi pewa oshimaliwa loshikando shimwe momwedi fiyo oikandjohoololo aishe ya pwa ko.
Kansela okwa ti ova tameka nale okuyandja oshimaliwa koikandjohoololo itatu ngaashi Onayena, Eengodi noGuinas.
“Oshimaliwa eshi kwa li nda pewa onde shi yandja keengeleka mbali domoshikandjohoololo shange. Ongeleka imwe onde i pa N$7 000 omanga imwe oya pewa N$ 4000
Jonas Moses oku li omufitaongalo wongeleka Oshivelo Evangelican Lutheran Church, okwa lombwela Kundana ta ti oshimaliwa eshi a pewa ote shi longifa okulongulula ongeleka yavo shaashi oya kulupa.
“Otwa pandula unene ookansela vetu vomOshikoto eshi ve na oshisho neengeleka tava lalakanene okuyambidida eengeleka detu,” Moses ta ti.