FNB a kunghilila ookalyamupombo

FNB a kunghilila ookalyamupombo

Auleria Wakudumo

Omukulunhu womakwatafano moFirst National Bank (FNB) Kirsty Watermeyer okwa kunghilila kutya ombaanga otai ka longa novakengeleledi ovo tava vake oimaliwa yovanhu mombaanga.  

Watermeyer okwa holola kutya ombaanga oi na ovakonakonai naavo hava longele kumwe novanambelewa vetanga leameno opo va kwashilipaleke kutya ova yandja ouyelele wa pumbiwa okutula eembudi konima yokakuma. 

Eshi osha holoka konima omunafaalama womoTsumeb a kanifa eemiliona 3.3 oshoyo omulongifikola kwali oo a kanifa omiliona N$1,1 moshitukulwa shaMusati. Watermeyer okwa ti ombaanga oya didilika omanyenyeto oimaliwa tai kana molwa ovakengeleli a ninga mahapu paife. 

“Ngeenge oshibofa shoukengeleledi ile shoumbudi sha lopotwa, ombaanga ohai ningi omapekapeko omoule hatu longele kumwe novapolifi novakwatelipo voveta, tu kwashilipaleke kutya otwa yandja ouyelele weembudi owa yandja meendelelo, Watermeyer ta ti. Okwa weda po yo ta ti FNB ota kwashilipaleke kutya eembanga dovanhu odina eameno lopombada nonghene vati ohava twikile okulundulula eameno lavo okuamena oimaliwa yovanhu. 

“FNB oha pula alushe ovalongifi vaye opo va longife eepassword dakola okulongifa keembaanga davo dokongodi nokukala va kotokela eembudi ile omakwatafano eembudi vati taa di kombaanga,” Watermeyer ta ti. Watermeyer okwa holola ta ti FNB vati okwa tota omikalo dihapu dakola okuamena oimaliwa yovalongifi vombaanga yavo. Watermeyer okwa kunghilila ovanhu opo va shunife oimaliwa yavo yefiku pedu ouna taveli hange monghalo tava fininikwa keembudi va nane oimaliwa pokaATM ile va tume oimaliwa kuvo.  

“FNB ota indile opo ovanhu va shunife oimaliwa ei hava nane ile hava tumu mefiku pedu. Eshi otashi kwafele opo uha tume oshimaliwa shi hapu ngeenge weli hange wa kwatwa notofininikwa keembudi,” Watermeyer ta ti. Watermeyer ota indile ovanhu va kwatafane nopolifi meendelelo ngeenge tave li hange monghalo va kanifa oshimaliwa ile va ninge ekwatafano neengodi daFNB 0819536262/ (061) 2992222/ (061) 299 2999 pokati ko 08h00 fiyo 19h00. 

-wakudumoauleria@gmail.com