Eefikola depangelo dili 203 moshitukulwa shaShikoto, di na eendodo dopetameko ohadi pewa oufila wokutelekela ovanafikola etete okudidilila kombelewa yomukulunhiwiliki wehongo.
Ofikola ashike imwe moshitukulwa vati ihai mono oufila, shaashi kai na omhungulilo, yoo vali kai na onhele yoku telekela ovanafikola.
Omukulunhuwiliki wehongo moshitukulwa shaShikoto Aletta Eises okwa ti vanafikola 51706 ohava li pofikola tashi pitile mopologalama ei yepangelo.
Eises ta ti etete otali ende nawa eshi novanafikola ohava kala va pama pedimo nokulitula mo meetundi davo.
Eises okwa ti keshe koshikako ombelewa yaye ohai yandje oukutu voufila keefikola di na eendodo okutameka pondodo yotete fiyo onhi-9.
Okwa ti neudo moshikako shotete oikandjolongo aishe moshitukulwa shaShikoto oya pewa oukutu voufila wetete lokutelekela ounona vofikola.
“Out na ashike ofikola imwe oyo ina i pewa oufila wetete shaashi oifkola oya taalela eshongo linene longulu omu tamu pungulwa oukutu voufila, kaku na sha yoo vali oikwafifo yokutekela ovanafikola,” Eises ta ti.
Okwa ti ofikola Oniipa Primary School oyo imwe ya pewa oukutu voufila vahapu ve li 500 shaashi oku na ovanafikola vahapu okufafanifa neefikola dikwao.
“Ofikola Imboto Primary School oya pewa oukutu voufila 30 shaashi kapena sha ounona vahapu pofikola opo. Onghee oukutu voufila ohava yandjwa sheli kwatelela komwaalu vonafikola ve li keefikola,” Eises ta ti.
Okwa ti eefikola dimwe ngaashi Oshinamumwe Primary School odina oikunino younamapya tai ende nawa eshi ovanafikola hava longo oikulya vavo vene.
“Ovanafaalama vamwe vomomudingonoko waTsumeb hava yambidida eefikola dihapu noikulya eshi hava kala tava talele po eefikola da yooloka nokuyandja oikulya,” Eises ta ti.
Okwa weda po ta ti eefikola dihapu oda talela eshongo leenhele dokupungula oukutu voufila oshoyo oikwafifo yokutelekela onghee eshi ohashi heta opo ombelewa yaye iha dule okutwala oukutu aveshe pefimbo limwe keefikola shaashi kakuna sha onheele ya kula.
“Eefikola dimwe ohadi longifa eembelewa dovakulunhufikola opo di tule mo oukufu voufila shaashi kapena sha onhele,” Eises ta ti.
Okwa ti neudo ombelewa yaye oye li pyakidila notunga eengulu dofikola shaashi opena eefikola dimwe dili momhumbwe yeengulu dokulongela ovanafikola ina wanena ounona.s
“Ohandi indile ovanangeshefa, ovaleli vopapolitika nomahangano opaumwene opo va yambidide eefikola doikulya shaashi natango otwa pumbwa omakwafo oikulya neenhele dokupungula oikulya yovanafikola,” Eises ta ti.