Victoria Kaapanda

ONGWEDIVA - “Eshi nda aluka, onda hanga omulumenhu oo ta tu Selma, ye ta popi ta ti: ‘ohandi ku pe alushe oimaliwa yange, handi landifa po oikombo yange, ashike iho landula.’ Eshi a mona nge okwa pita mo monduda ndle ta faduka po...” 
Edi oda li da popiwa kuHerodia Peelenga, mumwaina wanakufya Selma Peelenga (30), oo a dipawa komulumenhu ve na naye ekwatafano lopaihole.  Ouyelele wa yandjwa komukonaakoni woimbuluma mOmusati Simaho Moses, oshiningwanima eshi osha ningilwa mEtivali lwopo21h00, momukunda Oshitoo momudingonoko waTsandi.
Otaku hokololwa omulumenhu oo ina tumbulwa natango shaashi ina holoka momhangu, a dipaa Selma eshi e mu twa noshinima shi heshiivike. Mumwainakadona vati eshi a uda Selma ta kuu, okwa lotokela konduda oko, a shakena nomufekelwa ta piti mo monduda. Herodia eshi a mona kutya mumwaina okwa monifwa oshiponga, okwa lotokela poushiinda a ka konge ekwafo, ashike mboli, eshi a pilamena ko, omufekelwa okwa shuna vali monduda a ka manifulule oilonga yaye. 
Oshiningwanima eshi shinyanyalifa, osha ningwa moipafi yokaana kanakufya komido nhano. Omakonaakono opolifi otaa ulike kutya Selma okwa tuwa lwoikando 13 noshinima shihe shivike molutu laye alishe nokwa fila pombete opo a twilwa.
Pakudimbulukwa oiningwanima yefiku olo Herodia ota ti, mumwainakadona oo a kala omunambili, okwa uhala a hafa efiku olo ta yolo, novaneumbo inava fekela kutya otashi dulika pe na  sha osho tashi piyaaneke onghalamwenyo yaye. 
Konguloshi eshi ovanhu va ka nangala, Herodia vati okwa uda Selma ta kuu, naashi a li ta ende a yuka ponduda yaSelma, okwa shakena nomufekelwa ta piti mo. 
“Onda hanga e li mekungu lohonde, ashike okwa li e na omwenyo. Okaana oka li ka nangala puina ko inaka monifwa oshiponga,” ta hokolola.
Ta ti, okwa lotoka a ya poushiinda a ka konge ekwafo, ashike mboli omulumenhu oo okwa shuna mo monduda yaSelma, nokutwikila natango te mu tu noshilwifo osho a li ta longifa. Pefimbo opo opo a hanga omulumenhu oo ta tu Selma nombele, ye ta popi, nefimbo olo Selma okwa hangi ka a fya. 
Omulumenhu oo okwa kwatwa po kopolifi.