Festus Hamalwa

Omulumenhu weedula 19 okwa dipawa nondjebo eshi vati kwa li ta ka vaka nakaume waye. Oshiningwa eshi osha ningilwa koKuisebmond modoolopa Walvis Bay Etivali efimbo lokeengulasha.

Nakufya okwa tongololwa kutya oye Huisen Goseb novakwapata vaye ova shivifilwa efyo laye. Omukonakoni woimbuluma wopolifi moshitukulwa Erongo omupedu Commissioner Erastus Iikuyu okwa hokolola ta ti nakuninga oshihakanwa nakaume kaye okwa li va londa pombada yeumbo lomufekelwa tava vake.

Vati mwene weumbo ou e li omufekelwa medipao okwa uda elinyengo lovanhu tava ende pombada yeumbo laye nokonima okwa hondamena mekende ta tale kutya oshike sha londa. Okudja opo okwa mona omulumenhu ta tutumbile kondje omatemba okukoshela oo kwa li e li moluumbo laye. Opolifi oya ti okudja opo omufekelwa okwa kufa ondjebo yaye ndele ta umbu pombada kombinga oku taku linyenge ovanhu.

Eshi vati a umba okwa yasha nakulonda moshinena fiyo ta xulifila ponhele opo pombada yeumbo omanga mukwao okwa faduka po eshi a uda ondjebo ya topa.

Vati nakuninga oshihakanwa okwa hangika e na oinima ya vakwa meendjato dombulukweya yaye. Ookalyamupombo ovo vati okwa li tava kendabala okuteta pombada yeumbo lomufekelwa opo va shive okuya mo meni va ka vake.

Vati opolifi eshi ya ka tala poushiinda natango oumatyona ovo ova hangika va umbila oinima ya vakwa meni loluumbo. Otaku tengenekwa kutya ovalumenhu ava okwa li tava vake omaumbo a yooloka efiku olo eshi ve liunganeka okuteya omaumbo manga ovanhu va kofa.

Omufekelwa ou vati a dipaa  oku na eedula 44 ashike ina kwatwa po natango shaashi opolifi oye lipyakidila nokuninga omakonakono.

Opolifi oya ti omufekelwa okwa patulula oshibofa shoumbudi opo okamatyona kamwe oko ka faduka po ka kwatwe po diva.

Opolifi otai indile moshiwana kwaau e na ouyelele kombinga yomufekelwa ou a faduka po opo oshiwana shi kwatafane nopolifi keshe i li popepi.

– fhmalwa@nepc.com.na