Opolisi moshitopolwa shaShana otayi indile oshigwana shi kale sha kotokela oolefa dhiifundja tadhi dhingoloka moondoolopa dhaShakati, Ongwediva  nOndangwa, konima sho omukiintu gumwe a hunukwa mokulongelwa uupagani kaafuthi.
Omasiku ga zi ko opolisi oya lopetelwa omukiintu gwomimvo dhopokati a londekwa kaafuthi ye na ohauto kaayi na onomola konima, oku za poGame nelalakano lyokufalwa kOngwediva.

”Otaku hokololwa kutya mohauto moka a li a londo omwa li omuhingi oye awike tango ngoka a ka pitula aalumentu yaali mondjila, e taya hingi ya uka kondjila yaKatana. Sho a li a pula kutya ota falwa peni, oyati otaya ka pitula omufalelwa gumwe natango,” Opolisi ya hokolola.
Sho ya hingi ya yi kokule, aalumentu mboka okwali ya pula omukiintu ngoka a hogolole pokati kokukwatwa koonkondo kaalumentu mboka ayehe nenge otaye mu dhipaga.

Opolisi tayi ti, omukiintu ngoka okwa li a nukile koluuli lwohauto, e tayi tengauka ko kopate, elago enene ohauto okwa li ya thikama popepi nomusamane gumwe, kwa li ta ende mpoka ohauto ya thikama.
Omulumentu ngoka okwa li a igidha aalumentu mboka ya ethe omukiintu, sho a uvu ta kugu. Mbaka oya umbu mo omukiintu mohauto, e taya matuka po nohauto yawo.

Opolisi otayi kumagidha oshigwana shi kotoke nokukwashilipaleka oohauto adhihe taya londo, ngele odhi na ngaa uuthemba. 
Tayi ti, unene aantu mboka ohaya ithana ookasitoma yo yene, ihe ka yeli moshili. 
Tayi ti, pampango dhoshilongo, kehe ohauto tayi felefula kopate oyina okukala ya shangwa uukwatya wamwene gwohauto.
Aafuthi  ohayalongitha uulamba wa shangwa tekisa, mboka haya tenteke ko pakathimbo okuhila aantu ya londe moohauto dhawo, opo dhi ke ya yuge nenge dhi ka longele aantu omiyonena. 

“Kehe ngoka ta ka lefa okatekisa nakambadhale a tale tango ngele ohauto ndjoka oyi li kopate, nenge oya ndhindhilikwa, nokufelefula. Oshoka oohauto ndhoka tadhi ningile oshigwana omiyonena odha ninga odhindji paife,” opolisi ya popi ngaaka.
Shika otashi ningwa unene moondoolopa ndhoka ndatu. Opwa dhidhilikwa oohauto yoRanex osiliveli oshowo oCorolla Toyota ontokele tadhi dhingoloka moondoolopa moka.