New Era Newspaper

Header ads
Icon Collap
...
Home / A kumaida ovanyasha vakwao ve litule mo mounamapya 

A kumaida ovanyasha vakwao ve litule mo mounamapya 

2021-03-05  Staff Reporter

A kumaida ovanyasha vakwao ve litule mo mounamapya 
Top of a Page

Festus Hamalwa

 

Omunyasha a shiivika nawa Otto Kapuka, ota ti okwa hafa eshi a kufa etokolo lomondjila opo a ete po oshikunino shaye, osho paife tashi mu etele oiyemo.

Kapuka oku na oshikunino shi li momukunda Onangombe moshitukulwa shaMusati, omo a kuna oikunomwa ya yooloka ngaashi omapungu, omanuwa, omatama, oikapa nosho tuu.

Omulumenhu ou okwa shiivika nawa shaashi oku li omushangi womambo yee oku li omukumaidi wovanhu noku li yoo omunafaalama oo paife e na oshikunino.

Okwa ti oku na ohokwe yokulonga moikunino, noha landifa oikunomwa yaye kovanhu vahapu. Omunyasha ou moshikunino okwa kala mo oule weedula mbali paife nokwa kuta ovanailonga vavali.

 Kepulo ngeenge Kapuka okwa monene nande omadeulo e na sha nounamapya ota ti, ye okwe lilonga ashike kuye mwene nokupula omayele kwaavo ve na ounongo kombinga younamapya.

“Ohandi tu ovanyasha vakwetu omukumo opo tu kale hatu eta po oilongomwa yetu vene. Natu xulife po okukala ashike twa teelela epangelo li tu pe oilonga unene eshi tu li pefimbo lidjuu eli loCovid-19,” ta ti.

Kapuka okwa ti ina mona ekwafo loshimaliwa la dja kepangelo ile komahangano onhumba mokuninga oshikunino shaye, ndele okwa longifa oshimaliwa sha dja momambo aye ngeenge a landifa.

Okwa ti ovanyasha nava xulife po omukalo wokuhepifa oshimaliwa momalodu nomoinima ei itai va tungu sha. Yee ta yelifa kutya oshiwa ngeenge ovanyasha tava longifa oimaliwa yavo mokuninga oikunino voo va shiive okukala tava mono oshimaliwa sha wedwa po, ponhele okukala va teelela ondjabi yokomwedi. 

Kapuka okwa ti moshikunino oha mono mo oshimaliwa shihapu shaashi ovanhu ove hole okulanda oinima yaye. Okwa ti ovanyasha nava kale tava kongo omayele nghee omunhu a pumbwa okukala a ninga oshikunino, ngaashi naanaa ye a ninga.

“Ouministeli wounamapya netendululo ledu owa pumbwa okukala tai yandje edu noshimaliwa kovanyasha ava vehe na oilonga opo va dule okuninga oikunino yavo, voo va shiive okumona oshimaliwa nokupa vakwao oilonga yoo. Onghee ou oo ashike omukalo muwa wokushakeneka epangelo ondjilakati,” Kapuka ta ti. 

Okwa kwandjangela kutya Ovanamibia nava kale tava lande oinima ei ya longwa moshilongo unene tuu oikunomwa ei tai di moikunino yomeni loshilongo shaashi eshi osho omukalo muwa tau xumifa eengeshefa edi dishona pombada.

Kapuka okwa ti oku na ondjodi yokuninga oikunino ihapu moitukulwa yokonooli ngaashi Ohangwena, Oshana, nOshikoto opo a shiive a pe ovanyasha vahapu oilonga ashike okwa taalela eshongo lakula ledu apa ta ningi oikunino ei, shikwao vali okwa ti okwa pumbwa oilongifo ei ya pumbiwa opo i longifwe moikunino ngaashi ominino domeva nosho tuu.

Nonande a taalela omashongo Kapuka okwa ti ota twikile nokulonga noudiinini opo oshikunino shaye sh ihateke po. 


2021-03-05  Staff Reporter

Share on social media
Bottom of a page