Opolisi moUganda mOsoondaha oya ti oya manga po omulumentu gwoomvula 28 a li ta yi mongeleka moshilandopangelo Kampala a homata iitopitha sho a li a pangele oku ka ponokela moka. Aanambelewa oya li taya kongo wo ishewe aalumentu yatatu kwa itaalwa kutya oya li ya tumwa wo ya ka ninge iiponokela yilwe moUganda, opolisi tayi ti ngaaka. Omalalakano inaga yela, ashike ongundu yedhina Allied Democratic Forces (ADF), ndjoka ya yama kongundu yuukulo yedhina ISIS oya kala nokuninga iiponokela moUganda.

ADF oya li ongundu yoolebele moUganda ashike oya li ya sindika omimvo 20 dha piti noya li ya ka holama momithitu dhaDemocratic Republic of Congo, moka omo yi li sigo opaife. Omulumentu nguka gwedhina Kingtu Ibrahim, okwa li a mangwa po sho a li e li pokuya mongeleka yedhina Lubaga Miracle Centre, muumbugantu waKampala. Omupopiliko gwopolisi Patrick Onyango okwa lombwele aatoolinkundana kutya oondaadhi dhepangelo odha li dha mono uuyelele wompangela yaantu ya hala okuponokela ongeleka, noya li ya mono Ibrahim.

“Otwa li twa mono uuyelele kutya oshikulo shimwe osha li sha tumwa nale shi ka ninge iiponokela, onkene otwe shi landula,” ta ti ngaaka.

Onyango okwa ti oshikulo osha li shi na ondjato yi na iitopitha, mbyoka opolisi ya li ye shi pondola okutegulula. Pethimbo lyomapulaapulo, Onyango ta ti, okwa li a popi kutya ope na oombushe miilonga yalwe yatatu mboka ya tumwa wo ya ka longe iilonga ya faathana.

“Ote tu kwathele okumona aantu mbaka,” Onyango ta ti, ta ti wo nguka nakufekelwa okwa mangwa po shin a sha nuukulo.