Omukiintu gumwe mOshikandjohogololo Outapi okwa taambelwa moshipangelo sho anuwa a a ningi omasiku ta tukagulwa kuKansela gwayo Fillemon Shikwambi 

Vistorina Katumwa a yambukile momukunda Omunyele mOutapi, mOshitopolwa shaMusati, okwa ningi omasiku gatano moshipangelo, sho ali anuwa a uvu nayi komatukano omadhigu a kala ethimbo tega tuminwa pangodhi kuKansela gwoshitopolwa shawo. Ashike kansela gwoshikandjohogololo shaOutapi Kansela Fillemon Shikwambi okwa ti, shoka tashi popiwa kaashinda she, kutya okwe ya tumina omatumwalaka taga tukana, nosheya etela uuwehame kashishi sho shili. “Ngame omuleli, ondi shi iinima iiwinayi niiwanawa, kandi na esiku ndi tumbule nayi nenge ndi tuke oshigwana shandje. Itandi dhimbulukwa nande esiku limwe andi tukana, ngele otaya ehama, hangaye ndeya etele uvu,” Shikwambi ta ti ngaaka. Ta ti, okwali adhengelwa ongodhi, tayi mu pandula anuwa sho a tumu omatumwalaka tagatukana, noonomola dhimwe kaye dhi shi, ihe ka kwali a pewa ompito yokupopya oshoka kongodhi okwali kwa dhimwa. Kansela okwalombwele Kundana kutya ye kena nando uupyakadhi naashinda ye. 

Otaku hokololwa kutya Vistorina Katumwa, omushinda shaKansela Shikwmbi, a kwatwa kuuwehama sho avu nayi, komatumwaka gomatukano a shangelwa aniwa kuKansela.
Omonakadhona Aiyihe-oyiwa Homateni ngoka a li a mono omatumwalaka agehe ga tumwa kongodhi ya yina, okwa ti omayipumomumwe pokati kayina naShikwambi oga zi pokatale komeya hoka keli pokati komagumbo gawo.

“Kansela okwali a pombo omeya mokatale hoka haka longithwa kaanamukunda ayehe okunwitha iimuna noshotuu, a ukitha mokatale ke kopaumwene, keli meni lyodhalate ye,” Homateni ta ti ngaaka. Homateni ta hokolola ta ti, yinagona Anna-Maria Haufiku, okwali a pula kansela kutya oshike ta pombo omeya mokatale a ukitha mokatale ke, oye awike.  Ta pula kutya otaya kala taya nwetha iimuna yawo peni? Haufiku ta ti, Kansela okwali e mu yamukula kutya keshi wo.

Ta ti, okatale hoka ka kena mwene, nonande okali ka thewa po tango, kuhe yaakiintu mboka yaali moomvula dhonale, ihe okakala taka longithwa kaanamukunda ayehe. Homateni ta ti, mpoka opo pwa zi, omayipumomumwe pokati kuushinda, mpoka Shikwambi a tameke ta tumine yina omatumwalaka omadhigu taga tukana.  Aniwa tango okwa kala ha tumu noonomola kadhi shiwike. Homateni ta ti omatukano ngoka omanene  noonkondo, no itaga vulu okutumbula ga leshwe moshigwana.

“Osha kala shetu tula momalimbililo, kutya olye ha tuku meme, noonomola katu dhi shi. Omupya ogwa ka za mpoka, sho a tumu nonomola ye, ndjoka tuyi na, ihe  omatukano oga faathana naangoka ga kala haga tuku meme nale,” Homateni a fatulula. Homateni okwali a ningi onkambadhala adhengele Kansela. Ta ti, ka kwali a dhimbulula kutya olye ta popi naye oshoka okwa dhengitha ongoye mwene. Ta ti, okwe mu lombwele kutya, ayihe a tumbula mongodhi oye yi mona, nonande Shikwambi a kala tapula a fa keeshi shoka tashi popiwa. “Tango sho nde mu dhengele onda pula kutya oKansela Shikwambi ngaa, okwa ti ee oye, shoka tashi ulike kutya oye nani a kala ta tumine meme omatumwalaka omawinayi nomadhigu, ngoka ga teyagula po omutima gwameme,” Homateni a popi ngaaka.

“Meme paife okwa sa ombinga yimwe, e ta moniwa ombinzi yalonda. Ngaashingeyi, meme okuli kepango lyombinzi ya londa ineeyi pangwa nale. Ashike shino osha monika konima sho a li a kwatelwa moombete sho avu nayi komatukano,” Homateni ta ti. Ta ti, omasiku gazi ko yina okwa li a yakula okatumalako kongodhi. “Sho osms ndjoka yeya mo okwali a kugu nongodhi ye yili peke ta ti: ‘Oh ano Fillemon yaShikwambi onda lya shike she oshinene,’  e ta ihata po. Okwa falwa koshipangelo hoka a yi ko itaa popi,” Homateni ta hokolola.
Kansela Shikwambi sho a li tadhengelwa kuKundana opo atye kosha kehokololo ndika, ka kwali takutha po oongodhi dhe.