ETHIMBO lyomatango omanene aaNamibia oyendji ohaya kanitha oomwenyo dhawo okupitila miiponga yiihauto omadhipagathano niimbuluma tayi indjipala. Opolisi yaNamibia oya kumagidha oshigwana ta ti, aayendi nandjila taya katalela po aakwanezimo ya wo kiitopolwa ya yooloka, naya longithe nawa omadhidhiliko goomoondjila okuyanda iiponga hayi holoka unene pethimbo ndika lya taalelwa.
Opolisi oya kumagidha, aahingi kaaya hingilile, yo kaayahinge ye li kohi yo maluvu nenge ya vulwa. “Omimvo dha pi ti, pethimbo ndika lyomatango omanene, oyendji oya kanithile mo oomwenyo dhawo, ihe olwindji ohashi holoka ko kwaalandula omadhidhiliko gwoomondjila,” ya kumagidha ngaaka.
Ta ti, okuhingilila ita ku ti, okuthika. Nonando oto hingi kashona owuna okuthika ashike, omolwa egameno lyoomwenyo mwa humbata mohauto yoye oshoyo dha yakweni yeli wo moondjila. Mehuulilo shiwike omwa lopotwa iiponga yihauto mwa kwatelwa ekanitho lyoomwenyo.
Omupopiliko gopolisi moshitopolwa shaShana Thomas Aiyambo okwa popi kutya omulumentu gumwe ngoka ena omukanda gokuhinga okwa mangwa po kopolisi sho kwa li alyata okanona komimvo ndatu, noku matuka po. Oshiningwanima osha holoka lwopotuni 10h00 mOndangwa. “Omulumentu ngoka konima a li a matuka po, eta lundulula iikutu mbyoka a li a zala, eta ka tsikilike okunwa omalovu,” ta hokolola ngaaka.
Aiyambo ta ti, okanona hoa ka lyatwa otaka mono uuhaku moshipangelo shaNandjokwe. Ta kumagidha oshigwana kutya, una sha ningi oshiponga nashi kale aluhe tashi thikama etashi kongo omakwatho ga pumbiwa meendelelo. “Okanona komimvo heyali natango okalyatwa komuhinjgi keena omukanda goku hinga,” ta popi ngaaka.
Ta ti, okanona hoka ka ehamekwa lela, nako otaka mono uhaku moshipangelo shaShakati, Omuhinjgi ngoka naye okwa mangwa po kopolisi. Aiyambo okwa ti, oshitopolwa shaShana osha ilongekidha okulwitha iimbuluma pethimbo ndika, onkene itaya ka pitika nando omuntu taka konda nenge taka teya oompango adhihe dhatulwa po.
“Ngele oshigwana osha landula oompango adhihe dha tulwa po, nena ka pena nando uuwinayi washa tau holoka. Ethimbo ndika olyokunyanyukwa ihe kali shi lyokukala momaluhodh,” opolisi ya kumagidha ngaaka. Opolisi okupitila miikundaneki ya yooloka oya kumagidha wo aahingi yi hauto, ya hinge nuukeka oshowo okugwanitha po oompango dhomoopate.
Ta yiti, una oshiponga sha holoka mondjila dhenga konomola yopolisi 10111 nenge MVA 0819682. Natango oya kumagidha oshigwana shi kale sha kotoka, oshoka ethimbo ndika aafuthi oya tegamena okuteya omagumbo omanga oyene taya ka talelapo kiitopolwa yimwe.
Opolisi oya kumagidha omagumbo ga kale gena omukeeleli ethimbo alihe, oshowo ga kale ga tema pondje, ethimbo lyuusiku. “Omutenya omalamba naga kale gadhima oshoka aafuthi ohaya hilwa komalamba shoka tashi ya pe kutya kamuna omuntu megumbo,” ta yi ti ngaaka.
Opolisi natango oya kumagidha oshigwana natango shi kale mekwatathano ewaanawa naashinda ya wo opo ya kalelathane po uuna ya mono omayinyengo ga puka.